明興水務（402）挾住喺香港水務工程嘅經驗同優勢，進軍祖國，PE仲係低企單位數，殘到爆。明興主打香港水務相關工程，負責保養嘅供水系統，覆蓋全港過半數人口，唔係嘢小。
集團08年半年度（9月底止），營業額及純利都升超過60%。保守計數，08年度純利係咁易翻半番，純利5100萬銀，PE都係得8字頭單位數。明興純利唔係太大，但要咁睇，港府推出十大基建項目（估計耗資2500億銀），而水務工程又係基建工程嘅先決項目，明興已經商機處處，純利大有upside空間。
再講，明興上年投資湖南省供水公司，開始進軍祖國市場。而明興家陣市值得4億銀，若然要搞併購，壯大資產，明興市值晒士肯定唔止咁細奀，隨時係策略性股東中國水務（855）嘅翻版。買明興，以08年度12倍PE做目標，股價可見0.66元，回報有36%。
珠船現金多博得過
珠江船務（560）股價半年跌咗50%，兼創埋1年低位，仲未見點大幅反彈，要昅昅。珠船手頭淨現金近6.3億銀，每股淨現金0.7元，係現價（1.27元）嘅55%，已經有豐厚現金墊底。再講，珠船07年半年度（6月底止）純利穩升12%，就算全年度純利維持呢個增幅，去到1.36億銀，PE得7字頭，講業績，亦冇有好怕。資金呢期博反彈、輪流炒，遲早到珠船。買定離手，博珠船上番NAV1.74元，現價計回報率有37%。