早輪「大名牌」搞活動，搞到滿城騎呢怪盡出，雖然大名牌高層執得緊，話明唔係有錢就入得，仲要審查過啲嘉賓，要真係有錢有class，靚人型人blueblood先獲發邀請卡。
奀星蒲友博入場
不過啲真正阿太，都慨嘆場內鬼五馬六，高貴不再。皆因場內有巨星坐鎮，香檳靚酒任飲，惹嚟好多奀星、蒲友，着到行博大霧，好似相機小姐「梨園」，跌晒膊咁，一拖四位猛男殺到，但最終都俾人踢走。
前港口小姐，跳咗去做公關嘅「梅子」，同佢嗰位死口唔認嘅男友「文公子」，當晚都喺門外，雖然梅子契姐入咗場，但就唔帶得咁多個，搞到佢兩個喺場外左撲右撲，又要掹唔同人嘅車邊，扮分開到場，搞到文公子滴晒汗，好心啦，咁大場面，鬼得閒留意你咩！
Textby關仁
