傅穎（Theresa）前晚在《蘋果》網站直播節目《娛樂開CHAT》，即場發揮設計才華，在白T恤繪畫蘋果和寫上節目名，十分有心思。對於一直盛傳與鄧麗欣（Stephy）不咬弦，Theresa指二人性格文靜，所以由出道開始便很少溝通，但並非外間所講的不和。
至於Theresa與何韻詩、方力申和他的好友Neal等，先後傳出緋聞，她說：「何韻詩好錫我，我哋𠵱家雖然唔係成日見，但會有SMS聯絡，而方力申只係同佢合唱過一首歌咋，阿Neal係我好朋友囉，冇試過單獨出街喎。」Theresa表示曾受過愛情重傷，現在害怕再闖情關，只想專心工作。大家可登入《蘋果》網站 http://ent.appledaily.com重溫節目。 採訪：懷鈺 攝影：陳志嵐
渴望拍苦情戲 觀塘Maggie
Maggie：我想問吓你喜歡拍邊一類型嘅電影呀？
Theresa：我想拍啲慘啲嘅戲。
主持：你想拍啲慘啲嘅電影呀？但係你着衫鍾意開心嘅喎？
Theresa：係呀，呢個其實Paco（經理人黃柏高）都俾我玩咗，因為Paco平時見我都係好開心呀，成日笑呀，所以成日畀我拍啲喜劇，但係後尾發現我好容易喊，為咗好小事就會喊，感情比較豐富，所以應該拍啲慘情嘅戲。
主持：咁Maggie你覺得Theresa適唔適合拍慘情嘅戲，定係你都鍾意佢拍番一啲開心嘅戲呢？
Maggie：我鍾意佢拍一啲開心嘅戲。
少買性感睡衣 美國德州Con
Con：你咁鍾意設計，有冇諗過設計啲衫呀？
Theresa：我真係有諗過，但係可能係一啲特別啲嘅嘢啦，例如高踭鞋呀，或者係…我又好鍾意睡衣…
主持：做睡衣？！好性感喎？
Theresa：點解你一諗就諗到性感嘅呢？
主持：睡衣唔性感可以係乜嘢呢？好卡通嗰啲？
Theresa：唔一定好性感嘅，好可愛好舒服嘅pattern都得嘅！
主持：咁咪都係性感。
Theresa：另外，我自己都好鍾意買睡衣！
主持：邊一類型嘅睡衣呢？
Theresa：邊一類型都有，性感嗰啲就少啲囉！
母憂感情生活 青衣大孖
大孖：Hello，Theresa，你想唔想出國進修跳舞或者唱歌呀？
Theresa：我想出國讀書，讀語文，讀英文、國語、韓文同日文，我想學好多唔同嘅語言啦，自己好有興趣。
大孖：你平時咁忙，咁你點樣分配工作同屋企人相處嘅時間？
Theresa：分配唔到，我返到屋企都係喺度諗工作嘅嘢，我其實係一個工作狂嚟！有時我會同我媽咪pillowtalk，但都係傾做嘢、感情嗰啲，阿媽仲話：「阿女你成日係咁，你拍唔到拖㗎喇！」會有啲同屋企人傾偈嘅時間囉，有時仲會同阿媽傾到喊㖭。
版主：凌零發
