關心妍（Jade）、孫耀威（Eric）同麥浚龍（Juno）等，前晚喺電視城錄影《勁歌金曲》，其間Jade同Eric拖手合唱，場面都幾鬼sweet㗎！點知事後接受訪問嘅時候，Jade就話：「Eric係我細個時候偶像，可以拖住佢真係好開心！」咁即係擺明暗寸Eric年紀大啫！
頻頻約食飯
不過，當阿Jade知道Eric自爆感情空白好dry，佢就話：「我都好dry喎，咁啱嘅，咁佢得閒可以call吓我，我同佢其實都幾熟，約過出嚟唱K，不過唔係單獨約會，我哋成日話約出嚟食飯，但都唔成事，我仲係單身，可以同佢聯絡，我同佢間中都有SMS！」
Eric知道Jade咁出力硬銷自己都忍唔住講笑話：「我哋搞地下情！」不過佢讚Jade為人斯文大方之餘，就閂定後門話自己高攀唔起，仲忽然劃清界線話：「佢dry呀，咁我就潮濕啦！」
戥Juno開心
Juno同阿嬌鍾欣桐單「奴嬌戀」日日都有嘢爆，問Jade有冇同Juno打探內情，點知Jade就話打探就冇，只係有打招呼。至於Juno演出完之後，就坐保母車極速返去紅山半島豪宅，唔知係趕住陪阿嬌，定係趕住更新個blog呢？
此外，Jade噚日去商台宣傳，今次新碟嘅造型會喺服裝上大搞，佢話：「形象設計師會搵好多好時尚嘅衫畀我，衫嘅shape會好誇！」記者問佢胸部會唔會變得好立體，Jade就話：「係咪尖三角形嗰款？唔知㗎﹗可能會。」
