外滙L與老友到福崗（日文作福岡）打高爾夫，左丁山唔識打，想話跟埋去都自覺冇癮，跟住又知道前輩律師C等人又會到福崗打波，乜福崗對高球之友咁大吸引力呀，想嚟一定係有個靚場。
唔識打波，不如搵地方去，於是在酒店安排下，租咗一架車，係千五ccCorolla，汽車由專人送到酒店門口，肥仔K有日本駕駛執照，簽個名就可以上車，十分方便。日本汽車全部裝上GPS兼有電腦指揮點樣走路，上咗快速公路，就係一條直路直往長崎，公路上的限速八十公里，肥仔K依足規矩慢慢走，畀人爬頭爬到火滾，十架車有九架都唔依公路限速嘅，於是肥仔K亦踩油飛奔，去到時速一百一十公里仍然食塵，條氣唔順之下，踩到一百二十公里，部車即時偏左偏右，嚇到肥仔K連忙減速返回八十公里，一於安全第一莫亂跑，車仔有車仔嘅限制，唔到你逞強嘅。
入咗長崎縣境，只見山脈連綿，連續走過六至七個山洞隧道，每個由一千至三千公尺不等，先至入到長崎市，唔怪得肥仔K話過往日本戰國時代，長崎境內冇乜戰亂；鬼唔係咩，以前冇山洞隧道，長崎有天險可守，外來軍隊好難入侵啫。
長崎係山城，三面環山，前面就係深水港，故此好早就成為日本對外商埠，海港旁大道有一間香港上海銀行（滙豐）長崎分行，二層高英式建築，建於一八七○年代（開業日期係明治37年），現成為公用場地，係「國指定重要文化財」，間有遊客前往參觀，入場費一百日圓，左丁山亦特登走去影張相，如果鄭海泉冇嘅話，送張畀佢又點話！
到咗長崎，去到JR長崎駅停車場，擺低架車，到商場擦完壽司就叫架的士去「長崎原子彈資料館」。美國空軍在一九四五年八月九日上午十一時零二分，在長崎放下原子彈，逼令日本無條件投降。在原子彈爆炸地點，日本人成立了一座紀念館，細說原子彈之殺傷力及禍害，中國人與日本人對美國兩次用原子彈炸日本，有不同之觀點，不必細看，但館內有句口號，簡單啲講，就係「戰爭可以亡國，核武可以亡世界」，則大家不可或忘。