嗜食如我，經常禍從口入，早排就食錯嘢搞到皮膚敏感，醫生講咗一堆化學名詞，話可能係因為佢哋引起，所以開始留意有機產品。要過優質生活的確係要有優質收入，因為有機蔬菜都要比一般的貴50%以上。望住手上一個普通番茄，另一個係健康的有機番茄，後者明顯像我又瘦又奀，命仔緊要，食過奀茄後，我知道這才是我要追求的生活。
攝影︰楊錦文
http://appleblogpaper.blogspot.com
aboutme:Hallowina
超級饞嘴，相信幸福是吃一隻帶海水鹹味的肥美生蠔，滿腦都充滿美味食物，曾想過為好味的海鮮而移民澳洲，不過怕曬所以放棄。偏偏食量與身形不成正比，經常被人勸食多啲，實情係每日以優質食糧「餵飼」，胃部容量深不可測，可比黑洞。
超市有機展
成日聽到人講有機，但點先算有機？聽朋友說今日起city'super舉辦「有機食品展」，馬上去睇吓，由大大棵的生菜、到番茄、菜苗，甚至連喺挪威魚場用有機飼料餵養的三文魚，及來自加拿大的有機牛奶（牛隻無接受荷爾蒙注射）都有賣。𠵱家由天后的小舖頭到超市都話賣有機產品，各有認證標籤，而有機食物大都比一般的貴幾成，點分真假？請教香港有機資源中心主席黃煥忠教授，他說︰「全球有400多個有機認證機構，每個檢定準則都不同，目前無統一機制，但美國、澳洲、新西蘭等國家都有全國統一的認證機關，如美國的USDA。」即係話，要購買外國產品，認實幾國的認證標籤就比較穩陣。至於city'super就有專人到當地牧場、農田核實。重重關卡，可知有機食品展的產品比一般貴幾成，不過食得安心，對於下下講Health的LOHAS來講，絕對值得！
有機點止糞肥？
𠵱家唔少街市都話賣有機菜，部份仲自稱用糞肥，點先係有機呢？教授︰「好多人對有機食物一知半解，其實有機除咗不用化肥、採用無農藥、無添加的生產過程，就算用糞便都要經過堆肥殺菌才成為肥料。」睇番有機資源中心資料，齊晒以下四項先叫有機：1.注重保持產品的天然成份2.不施用化學肥料或化學農藥3.不施用人工合成物料4.不施用基因改造。有機蔬菜比普通蔬菜貴至少50%，營養價值係咪成正比先？「目前未有研究證實到有機食物營養價值較高，但因為不用化學肥料等栽種，對身體必定較為安全健康。而有機背後還有一個重要的理念『環保』，所以生產的過程，都強調保持農地的生態，過程中生產的廢物不能對環保造成損害。」咁即係除咗對我哋身體有益，對地球環境都有考慮，唔想香港過幾年無冬天，就要開始有機生活啦。
私家田種有機菜
如果只係話健康啲，好似好虛無，鬼叫我天生饞嘴。吃過有機菜，我知自己好難回頭。
早前曾幫襯過食家徐蒝（Margaret）開的私房菜館鴛鴦飯店，已發覺食物特別有鮮味，原來Margaret係有機食品的支持者，更在元朗自設一塊私家田，自給自足供應蔬菜等食材到餐廳。「有機蔬菜的味道很濃、很甜，不像一般蔬果淡而無味，質感也很不同。」她即席放了一片自家種的新鮮生菜入口，連洗都無洗，因為無農藥全天然，一邊看着將未清洗的生菜放入口，另一邊聽到「索索」生菜聲，我放膽跟佢一齊食。然後再試一片出自私家農場的番茄，一切開，果然見到質感稠密，味道比一般番茄濃烈，留在口中良久不會散去。「食物最重要不時不食，過份催谷生長的食物始終會失真，其實我只是從味覺去考慮，採用本身味濃的有機食物，就連調味品亦不用多放，鮮味已自然散發出來。」由於是私房菜，加上採用有機蔬菜，鴛鴦的收費不便宜，6人起套餐（7餸1湯）每人收$560。
OrganicFair2008
即日起至4月10日
尖沙嘴海港城3樓city'super
查詢︰23758222
鴛鴦飯店
地址︰灣仔船街18號
查詢︰28660868
最新回應
AL︰仲以為有機得個貴字，原來除咗對我哋身體，對環境都有益處，咁真係可以一試。
Foo︰我都去咗個有機展，真係好多種類，估唔到連朱古力、茶葉、有機食油都有。
相關超連結
http://net3.hkbu.edu.hk/~hkorc/
香港有機資源中心的官方網址，詳列有關有機食物的標籤、認證的方法等等，更有農市場推介。
