腹大便便嘅莫可欣噚日代表MTV台，到觀塘出席一個宣揚預防愛滋病嘅活動，一同出席嘅仲有古巨基。可欣話自己個肚已經六個月，體重增加咗十磅。佢話：「雖然唔係重咗好多，但醫生話呢個磅數都算正常，最重要係BB喺個肚度發育健全。」
擇個好時辰
手上戴住鑽戒，一臉幸福嘅莫可欣透露預產期係6月底，佢好坦白咁話：「我年紀大，驚唔夠氣力Push，加上我真係好怕痛，所以唔會揀自然分娩。」佢仲笑住話：「雖然我係鬼婆，但係都好迷信，所以已經搵咗個師傅幫BB擇好時辰，準備剖腹生產，求心安之餘，最重要係BB一世好運啦！我仲計劃好BB出世頭三個月會餵人奶，之後先至轉餵奶粉。」面對近排奶粉缺貨問題，佢話一啲都唔擔心，因為佢已經搵咗奶粉贊助商。
唔適宜動土
至於BB嘅爸爸方中信，本來想搵人裝修BB房，後嚟經裝修師傅點醒，有大肚婆喺屋企唔適宜動土，所以打消咗呢個念頭。
莫可欣話：「我哋商量好，BB個名會搵師傅改，而方中信有啲fans都有幫BB諗咗啲名，有啲都幾得意，我哋都幾鍾意，但係一切都要等師傅算過先至決定。」雖然近日方中信喺北京忙緊拍戲，但佢會度定期返嚟香港陪可欣坐月，另外，佢哋亦會搵人幫手陪坐月湊BB，到時可欣會休息三個月左右，𠵱家佢最擔心係工作會受到影響。
採訪：馬建華
攝影：林德雄
