18萬歐Look貨Van

一提到客貨車，大家就會諗呆呆笨笨、方到似個盒咁款嘅貨Van？睇到厭就不如轉吓Channel，睇吓韓國全新HyundaiH-1啦。佢用咗豪華MPV做設計藍本，令車內車外多咗幾分斯文醒目，170匹馬力輸出更勝日本對手，加上頂級Deluxe版賣價都唔使18萬，好吸引！

記者：鄭達基
攝影：伍慶泉
模特兒：Tobey

MPV化有貴氣

呢幾年喺香港見到嘅客貨車，絕大部份都係嚟自日本嘅兩大品牌，雖然佢哋都好刻意咁改變旗下新車賣相，但始終都擺脫唔到客貨車Style。不過，新近到港嘅HyundaiH-1就完全唔同，因為佢係以豪華MPV作設計藍本，造型年輕，線條圓潤流暢。試這部頂級Deluxe版，廠方更特別為佢加裝16吋合金胎軨、電鍍鬼面罩同埋車頭霧燈呢3項配備，望落明顯比同級對手Smart好多，仲添多份歐洲車嘅貴氣。車廂陳設都一樣MPV化，除咗常見嘅簡單錶板同四幅式軚環外，直立式中控台頂端仲加有呢幾年好興嘅大面板音響，係咪好潮，擺脫晒客貨車嘅土味？

■前排3座位，中間椅背可放低變杯座。

■乘客席前方有雙層儲物匣，夠靈活。

■車廂陳設酷似大型MPV，觀感無一般貨Van咁呆笨。

搬得跑得有功架

講明係客貨車，得個樣又點掂？H-1唔只樣靚，實力一樣有，載貨空間大，長度同高度分別係1,585mm同1,350mm，而入口亦有近1,600mm闊，載重量更達約1.1噸，好掂啦！仲有，後排座椅一樣可以擺埋貨，因為佢有雙趟門，無論上落嘅係客定係貨，都一樣話咁易。我最Buy係佢嗰台全新2.5公升CRDi柴油Turbo引擎，以170匹馬力同40.0kgm扭力遠遠拋離對手，而且運轉時夠寧靜，更符合EuroIV環保條例，耗油量更只係約每公里$0.81（以油價$10.07計算）！試車當日，我揸住佢攀爬多彎嘅大埔道同龍翔道，發覺5前速手波同引擎非常合拍，而且只要輕踏油門，源源不絕嘅動力已經湧出，搞到次次喺燈位起步都放甩嗰啲日本對手，喺度真係要同佢哋講聲唔好意思！