由福崗揸車去長崎，約需兩個多小時，未到長崎之前，見到路旁有好多廣告牌宣傳嬉野溫泉，於是黃昏回程之時，靠GPS導航系統，揸車去到「嬉野」，此地乃一個溫泉小鎮，鎮上有好多溫泉旅館，俾我哋搵到一間外貌有古風之清幽旅館，入內一問，每人收一千日圓浸溫泉，任浸唔嬲，抵到極啦，立即泊低架車入內。呢類地方，唔識日文就冇得傾，不過肥仔K留日三年，講日文似講廣東話，與日本人一啲溝通問題都冇，肥仔K話平時上堂講日文，宿舍內與國際學生講英文，見到台灣、大陸學生就講普通話，打電話回港就用廣東話，腦筋轉台唔使一秒鐘，久而久之，已成為習慣。
入到溫泉，沖涼洗頭擦身先至浸水，池內有唔少日本人，一見到我哋兩人入池，立即起身走出去露天溫泉，肥仔K話：「唔使客氣㗎，日本男人唔知點解，好怕──或者好憎與外國人一齊浸溫泉，總之佢哋一聽到外國語言就周身唔聚財。我哋成班國際同學一去溫泉，就大聲講英文，所有日本人就立即離池而去，等我哋有空位浸浴，都唔知幾爽！」
果然係噃，浸咗十分鐘，左丁山一世仔學人浸吓露天溫泉，一出到去，池內日本男人又全部起身走入桑拿房，讓我哋兩人享用露天池。晚上氣溫十二、三度左右，赤條條在室外，居然一啲都唔凍，又係幾過癮噃。一千日圓（約七十五港元）有如此享受，喺萬物昂貴之日本，直情超值。
自嬉野揸車返福崗，GPS系統竟然在偏遠地區死火，唔識教司機點樣走出小鎮小路返回快速公路，肥仔K只好揸車周圍行，好彩見到一間藥房超市，立即駛過去，搵到一位師奶司機問路，師奶好好人，叫我哋跟住佢架車去到快速公路入口，佢先至掉頭而去。上到公路，一切易辦，個半鐘頭後返到福崗，吃完拉麵就上床瞓覺，即刻熟睡如泥，唔怪得有老友鍾意到日本住溫泉旅店，晚上浸溫泉，再享受按摩，不知人間何世矣。