在電影《寶貝計劃》中，古天樂已經有一趟跟小孩子合作的機會，行內人一向視此為畏途。不過古仔卻樂此不疲，在張艾嘉導演的新作品《一個好爸爸》中跟劉若英再向難度挑戰，一次過跟嬰兒、幼童幾代小孩演戲。
早前古天樂跟劉若英合作演出女性為主的電影《生日快樂》，這趟再踏征途合作演出電影《一個好爸爸》。片中古仔飾演一名非常疼錫女兒的黑社會大佬，為讓女兒在一個正常環境成長，不惜扮鬼扮馬之餘更辦學作育英才，犧牲不可謂不大。
嚮往家庭生活
現實中一向自言嚮往家庭生活的古仔表示，他日生兒育女時已有「最壞打算」，他笑說：「雖然拍咗兩部同細路仔做嘅戲，不過仲未嚇親我，其實小朋友唔係咁難應付，最緊要睇你有冇耐性。」他補充說：「我覺得對小朋友你唔係畀物質生活佢就夠，真係要畀心機同時間。」
古仔直言他日榮升父親時，一定會減少工作，騰出更多時間照顧孩子，他說：「細路仔個成長過程好有趣，好似佢哋一歲生日、第一次叫爸爸都係好珍貴的經驗，錯失咗就冇得搵番，所以希望可以放多啲時間對住佢哋。」不過古仔笑言到時首要任務還是戒煙，他說：「冇辦法，細路仔對煙草好敏感，要做好父親本份，戒煙一定唔少得。」他透露這次跟幾個月、幾歲到10多歲的小女孩同場演出，煙也少抽了，就是想她們更投入做自己的好孩子。
再合作當回報
劉若英笑言這趟再跟古仔合作除了是應師傅張艾嘉要求外，還是想報答古仔，她說：「上趟套《生日快樂》係女性片，今次咪拍番套男性電影報答佢囉。」不過她就投訴師傅非常偏心，對古仔讚不絕口，她說：「古仔做咩佢都話做得好，我就評語都冇多句。不過算啦，話明係男性片係偏心啲，而且古仔佢湊細路真係有一手，我半成都學唔到，佢真係成個湊仔公咁。」
採訪：何永寧 攝影：林德雄