任賢齊稍後會在港開演唱會，已為人父的他希望演唱會能帶給觀眾溫馨感覺，隨時將一家四口開心的片段與大家分享也不定。雖然小齊考慮過與女舞蹈員跳辣身熱舞，營造驚喜，不過今次是慈善演唱會，只怕兒童不宜，影響善款數字。
任賢齊5月將於紅館舉行兩場演唱會，今次小齊的酬勞與演唱會的收益撥捐仁濟醫院。跳舞一向不是小齊的強項，不過今次他想營造驚喜，會嘗試多點勁歌熱舞，問到會否露肉和與女舞蹈員大跳辣身舞？小齊笑言：「如果露肉就可以開一個演唱會，咁我不如喺演唱會上裸奔算啦。」
「我唔想太激」
不過小齊也想試試跳辣身舞，他笑謂：「益吓我都好喎！做咁多次演唱會都好似未試過，不過今次演唱會係慈善嘅，可能會有一家大細嚟睇，我都唔想太激，兒童不宜就唔好啦，籌款嘛！藝術同色情只係差一線，下次唔係慈善再試啦。」他希望今次的演唱會能讓大家感受到溫暖和溫馨。
要感受到溫馨，小齊會否考慮像李克勤般，將子女的肖像印在T恤上，作為其中一套演唱會服裝，他說：「我都知克勤有咁做，我睇吓到時氣氛配唔配合，其實大家都知我有小朋友，不過心情就好矛盾，一方面想低調，但又希望可以同大家分享我嘅喜悅。」
請唔郁偉仔
小齊邀請了曹格擔任嘉賓，他試過邀請梁朝偉，他說：「因為我好多朋友都想聽偉仔唱歌，有一次我同佢食飯，我咪問佢有冇興趣嚟我演唱會玩吓，不過佢話佢好耐冇唱歌，有啲驚，不過我都唔會勉強佢，唔想人哋有壓力，唔做都冇所謂。」
採訪：胡比 攝影：陳順禎
化妝：Manyee
髮型：CliffChanofHairCulture
服裝：Bauhaus
場地：MarcoPoloGateway