到Kiruna嘅第二日，開始進行各式各樣嘅雪地駕駛活動。坦白講，真係好爽，最正係唔怕車撞落雪度會凹會花，甩尾撞到BangBang聲都無有怕。第一次喺雪地揸長途車，地面全部係雪，根本都唔知邊條係馬路，惟有跟住前車行。人哋部車尾燈全被冰雪封住，已經好難睇到，自己車尾亦然。噴水口被封，水撥點撥都撥唔清啲雪，其中一部車仲撥雪撥到個水撥斷埋，勁爆笑。
行行吓，突然一部大車經過，隨即，漫天飛雪。已經即時踩Brake放慢行，說時遲那時快，部車已經滑咗入路邊，被雪「食」住咗。結果，咪要拖車囉！瘀到暈又不失係一種特別嘅體驗囉。臨走嗰日，幫我拖車個鬼佬仲送咗條車用拖索畀我放喺車度守門口㖭！唓，香港都唔落雪嘅！（待續）
記者、攝影：梁美甜
鳴謝：VolvoCarsHK