05年從台灣來香港發展事業的劉心悠（Annie），前晚在《蘋果》網站直播節目《娛樂開CHAT》接受訪問，劉心悠在改編自日本漫畫的同名電影《軍鷄》中扮演妓女，為了了解角色，心悠原本想看漫畫，不過最後卻放棄了，她說：「我睇咗兩本就睇唔落去，本書簡直係變態！好在我個角色同原著有少少唔同，所以唔睇都冇所謂。」但她希望各影迷會喜歡這部電影。大家可登入《蘋果》網站 http://ent.appledaily.com隨時重溫節目。
採訪：懷鈺、林惠卿 攝影：陳順禎
從角色中學習九龍灣Jamie
Jamie：由《阿嫂》到《出埃及記》，你最鍾意邊個角色？
Annie：其實我覺得每個角色都係好唔同Case，我係經過做咗好多功課，我每一個角色都好鍾意。但我覺得好特別嘅係近期嘅《軍鷄》，因為個角色真係超現實，我呢一世都唔會有機會做呢樣嘢，你話飾演人哋老婆，或者係一個瑜伽老師，你可以選擇去做，人生之中會有機會，但係去club裏面跳舞嘅一個女仔，我未必會有咁嘅機會，所以我覺得係超乎現實。
Jamie：咁你覺得最有挑戰性係邊個角色？
Annie：其實每一套戲都有挑戰，第一部戲《阿嫂》最挑戰係我唔識講嗰種語言，我需要講廣東話去做一個十幾歲好天真嘅少女，我覺得個難處係語言方面。去到《黑夜》，又要扮一個好反叛、好頹廢嘅造型出來，係要玩地下音樂嗰類嘅感覺，呢個都畀我一個好大挑戰。去到《出埃及記》，就真係需要練瑜伽，嗰度都用咗好一段時間。講真，直到現在，我真係每個角色都好鍾意，因為可以學到好多特別嘅嘢。
主持：你會畀自己最高分係邊個角色？
Annie：我畀唔到自己幾多分，因為我自己會睇個過程，我演邊個角色都真係用好多心機去準備，開戲前嗰段時間我係準備咗乜嘢，我覺得我睇重係呢樣嘢。
話你知：配襯飾物一變三
劉心悠一直有個習慣，就係儲很多不同類型的飾物。當日，她就帶了其中一些近期比較喜歡的首飾上節目，跟大家分享配搭飾物心得。她認為一件看上去無論多普通的飾物，只要你會配搭，也會很好看。好像一條黑、白、綠搭配的珠鏈，心悠就可以一物三用，她說：「條鏈係我為咗工作襯衫而特別買，佢除咗可以攞嚟做頸鏈之外，我有時仲會攞嚟做手鏈，呢三隻顏色配搭埋一齊，個效果好靚。因為條鏈都幾長，所以有時我會用嚟做腰鏈，襯裙同牛仔褲都得㗎。」
