相識廿幾年嘅Beyond三子，黃家強同黃貫中（Paul）近年鬧不和。不過今年係家駒逝世15周年，家強搞咗一連串紀念活動。噚日佢去省善真堂拜祭亡兄，當係清明掃墓兼祈求哥哥保佑一切活動順利舉行，仲買咗好多紙紮名牌去拜祭，包括銀包、皮帶、手機同波鞋。
「踏出第一步」
家強表示4至6月有一連串活動，將會分別喺7間大學舉行研討會，第一個研討會於下月9日喺香港大學舉行。5月仲有bandshow同展覽館，館內會重現家駒band房同屋企嘅面貌。6月會推出唱片，當中5首歌係家駒生前未曝光嘅作品，家強話：「其實一直都好想搞個紀念活動，今次15周年真係好大意義。6月出嘅碟，5首歌係哥哥92年嘅作品，旋律會係原汁原味哥哥嘅作品，只係監製同編曲會由我同好友梁翹柏一齊做。」
重頭戲將會係大型慈善音樂會，家強話想喺哥哥生忌6月10日舉行。問到會唔會考慮Beyond三子合唱，作為完美嘅句號，主動聯絡阿Paul，家強話：「我都希望，我將會先踏出第一步，為咗哥哥名義化解好多嘢，無論點，過咗去就過去，睇在家駒份上。」呢五項紀念活動，家強嘅經理人公司會全力支持。
阿Paul噚日接受電話訪問話：「其實我未收到家強電話，但世榮有提過，詳情未知，所以未覆到，家駒過身15年，我都想為佢做啲嘢。」問佢會唔會配合家強，阿Paul話：「睇佢有冇誠意啦，都未同我講，又未知日子，唔通搭巴士去咩。為家駒做嘢我一定支持，呢個係毋庸置疑嘅，不單止家強搞，其他人搞我都支持。」
