周潤發雖然早已是三屆金像影帝，更是國際知名巨星，但他今年首次入圍金像獎的最佳男配角，他自言未得過此獎，故相當想要。發哥還公開今屆各獎項的心水得主，他力捧《神探》的劉青雲，希望他成為冧莊影帝。
周潤發前晚與太太陳薈蓮同到圓方出席《戰火逃城》（EscapefromHuangShi）首映，劉心悠、賈曉晨、李彩寧、莊思敏及Freeze等都有出席。發哥表示他與楊紫瓊在戲中皆只是串星，稍後他與楊紫瓊及導演等會到黃石出席晚會，屆時他與工作人員均會獲當地市委書記頒發好市民獎，發哥說：「我第一次得好市民獎。」
首提名配角
發哥憑《姨媽的後現代生活》獲提名第27屆香港電影金像獎的最佳男配角，他坦言：「我第一次提名最佳男配角，心情好緊張，幾晚瞓唔着，典床典蓆。」發哥不介意將各獎項心水公開，女主角選斯琴高娃，至於影帝，他說：「叮噹馬頭，好難揀，我揀劉青雲啦，唔畀人冧莊咩？」翻查資料，發哥在1987及88年分別憑《英雄本色》和《龍虎風雲》贏得金像獎最佳男主角，是唯一一位冧莊的影帝。
發哥今屆有份角逐最佳男配角，他說：「我買自己，我係新人，首次提名，好恨攞，恨到出晒面，未攞過嘛。」他認為《野。良犬》的邵音音得最佳女配角，最佳新演員則選《野》片的文俊輝，發哥說：「我鍾意《野。良犬》個名。」至於最佳編劇獎，他則揀《姨媽的後現代生活》，他說：「《投名狀》編劇有八個人，每人畀一個獎，經費好貴呀，唔好畀佢哋攞。最佳電影我揀《投名狀》，導演梗係許鞍華，之前亞洲電影大獎，《密陽》攞咁多個獎，導演、電影又女主角，所以我哋要分贓勻啲。」
冇睇過淫照
發哥表示他到過墨西哥拍周星馳監製的荷李活版《龍珠》，故有兩個月不在港，不清楚香港新聞，他有沒有過淫照？發哥說：「冇，唔會睇，我唔睇得呀，我學緊葵花寶典，要做東方不敗，唔可以接近女色呀。」他透露稍後參與三部電影拍攝，包括杜琪峯執導的電影、江志強開拍的新戲，及與鞏俐合演的新戲《上海》，但三部電影現正在改劇本階段。發哥還拿《風雲II》開玩笑，他說：「《上海》因為審批出問題，可能唔可以喺上海拍，有機會喺泰國拍，咪『上海與風雲』囉，彭氏兄弟做導演。」
採訪：魯萍
攝影：陳慧安
發哥金像獎貼士
最佳電影：《投名狀》
最佳導演：許鞍華《姨媽的後現代生活》
最佳男主角：劉青雲《神探》
最佳女主角：斯琴高娃《姨媽的後現代生活》
最佳男配角：周潤發《姨媽的後現代生活》
最佳女配角：邵音音《野。良犬》
最佳新演員：文俊輝《野。良犬》
最佳編劇：李檣《姨媽的後現代生活》
