環顧市場上高清機頂盒大多係二、三線細廠出品，最近國際音響界老大哥Victor，終於推出VDA-801：插外置HDD、有預錄。據代理商恒匯表示：「遲遲唔出係為咗驗到零Bugs，而且我哋係OFTA新檢測制度下首批、一Take過關機頂盒！」
記者：朱崇德
攝影：梁細權
Model：Eunice
20新例舊機唔Pass
高清機頂盒投訴問題無日無之！最常見係㩒兩㩒就Hang機、話有錄影但買到返去變冇錄影、FirmwareUpgrade越升越壞、顯示冇字幕、甚或機身熱爆玻璃枱！可能市民投訴太多，業界表示有關當局對新入紙的機頂盒，明顯收緊了批出標籤制度。
就VictorVDA-801而言，經過的檢測細節多達20項！如HD、SD影音解碼、中英文字幕顯示、EPG節目台號顯示……恒匯指，「𠵱家只要有一項不達標，都隨時攞唔到升級版（高清）機頂盒標籤」。據知好些已推出市面的舊機頂盒，都要攞嚟翻「驗」，最後發現好多都要喺軟件上執正好幾次，先達到有關當局要求。而VDA-801則係新收緊檢測制度下，一Take過關的升級版（高清）機頂盒。
一星期預錄無花假
現時市面好多所謂「可錄影」式機頂盒，大多係睇到先錄到，感覺真係把鬼火！而市面「預校錄影」的機頂盒不多，AV場Sales表示主力只有早期的EIGHT及今日介紹的VDA-801。就記者實地測試，在EPG節目名稱、時間顯示下，可以作一星期的預校錄影。至於使用介面方面，感覺同EIGHT及EURON等機種有八、九分相似，不過代理表示，VDA-801使用了最新UpdateFirmware，所以按鍵反應更迅速之餘，使用上更加穩定。
實測三日無Hang機
至於其他使用功能方面，Setup尚算簡單，基本一插好機就自動追台，分零鐘就Set好晒台唔使煩！使用介面基本行GUI圖示介面，簡單易明之餘，仲有EPG細圖顯示介面節目表，感覺OK方便。而且佢一樣對應MHEG-5上網功能，駁LAN後可玩到即將推出的互動電視頻道。其他功能如5.1聲道、HDMI/1080i影像輸出，就記者實測試用三日（冇熄過機），暫時都未遇上Hang機情況，感覺相當良好。至於價錢方面，定價$1,790，相對現時市面一般SetTopBox鎖定的$1,680只係貴咗$110左右，不過就功能齊全。始終係市面上較少見的大牌子出機頂盒，呢百零蚊買個牌子、買個安心，抵畀！
Sales有Say！
現時市面只有EIGHT同Victor有預錄功能，不過EIGHT的USB插口設在機前，插硬碟時機前無可避免多條線，感覺Victor放在機尾較細心又美觀。
查詢：恒匯電業有限公司（23771211）