曼聯前鋒朗尼同未婚妻高蓮，傳咗好耐會拉埋天窗，最近終於證實嚟緊嘅夏天佢哋會正式結婚。𠵱家後生嘅一對真係寧舍囂啲，我求大俠八到個婚禮嘅使費要成300萬鎊（約4,700萬港元），地點又懶神秘咁唔對外公開住，你兩個都夠寸喇！
不過求大俠想知嘅嘢點瞞到我，聽講朗尼會喺法國南部舉行婚禮，仲要係6月10至14號搞足4日㖭，驚班親朋戚友咁遠由英格蘭嚟到，玩一日唔夠喉喎！仲有呀！直到目前為止，除咗朗尼同高蓮嘅直屬屋企人、伴郎同伴娘，以及買咗獨家拍攝權嘅項目公司之外，係冇人知實際日子係邊日，而地點喺邊度㗎，你哋話巴唔巴閉吖！神秘成咁！
搞足4日專機接送
我求大俠又八到正式行禮嗰日應該會係12號，屆時大約會有60個親友觀禮，朗尼仲會用私人飛機接送佢哋去會場，去「飲」都「飲」得咁舒服，有錢真係大晒！至於其餘嗰3日就搞吓香檳派對、BBQ大食會咁，等班親友搭長途機過嚟，玩幾日都抵啲，諗得認真周到。
來賓衣着方面，大致上都係黑色或白色「老西」，最搞笑嘅係朗尼好似有條例寫明，叫啲親友唔準着愛華頓球衣，否則要全部剝光喎！睇嚟都係搞gag居多。朗尼囂張，未婚妻高蓮一啲都唔輸蝕，佢套名牌Marchesa婚紗亦要價值10萬鎊，高蓮仲成日飛去美國試幾次身，驚死着得唔靚，你兩公婆都得㗎喇！
C朗又換畫呢次玩認真
呢邊朗尼就嚟拉埋天窗，嗰邊佢隊友基斯坦奴朗拿度（C朗）最近又識咗個新女朋友美亞，聽講係一個皮膚稍稍偏黑嘅模特兒，外間仲傳出C朗幾個禮拜前，已經帶咗新女友返葡萄牙見吓幾位老死㖭，睇嚟今次好認真咁喎！