數碼電視廣播都已經推出咗一段時間，啲機頂盒嘅穩定性都幾好，所以小妹決定加入收睇高清電視節目嘅行列，買番部機頂盒。
亞洲高清協會幹事Alan同小妹講，𠵱家買升級版機頂盒，一定要揀啲有錄影功能。收到，小妹早幾日去旺角相熟嘅影音店揀機頂盒，問吓啲老友有乜好介紹；佢話呢排較熱門嘅機頂盒有OleviaZMT-620FTA、PicazzoM218同EightHD-838，都係外置硬碟儲存，表現各有優劣。
老友話，OleviaZMT-620FTA因為只係支援即時錄影，操作簡單唔複雜，啱晒我哋啲女仔人家用，錄播出嚟畫面都好順暢，顏色自然，但有得必有失，唔可以預校錄影。PicazzoM218唔單止可以將節目錄喺外置硬碟機，又可以錄喺CF卡，仲有埋預校錄影，都幾方便嘅，但部機有兼容嘅問題，有啲硬碟錄到播唔到。EightHD-838整體表現最好，錄播出嚟畫面嘅流暢度三款中最好，不過，預校錄影時間有偏差，要自己就番下啲誤差時間。
𠵱家已經用投影機睇數碼電視廣播嘅老友電腦商會創會會長張耀成，佢建議小妹，「有得揀嘅話，梗係揀部可以預校錄影功能。冇人喺屋企都可錄到節目嘛。」
逢周一至周四刊出