左丁山住在福岡君悅酒店，行過隔籬就係CanalCity，話都冇咁易。點知一行到商場，一晚之內，竟然在兩個不同地點，碰到外滙L，巧合過巧合。外滙L遠在馮孝忠出道之前，已經係滙豐首席外滙交易員，後來被加拿大某銀行重金禮聘過檔。大家大大話話有二十年未曾在香港見過面，點諗到會在二○○八年復活節喺日本福岡碰面兩次也。賓架C話與成班朋友一齊嚟，男士打高爾夫，女士去行街購物，一樂也。
然後在星期日早上吃早餐時間，碰到名人雲氏夫婦，雲老先生仲話：「今朝有冇碰到鄧一哥呀？」乜鄧一哥都嚟咗福岡君悅咩？與佢緣慳一面矣。福岡市內，國際著名五星級大酒店並不多，好似只得君悅一間，香港遊客住這裏，不足為奇。
唔行CanalCity，而去舊區「天神」一帶嘅話，並不太遠，由君悅出門向左行兩分鐘就可以過橋到中洲（洲者，河中之島也），自中洲再過橋，走路不到十分鐘，就到達大丸、三越，全程大概要行十五分鐘，一啲都唔遠。晚上中洲河邊，有好多熟食檔擺賣，檔檔門口坐滿人，左丁山行埋去望吓，覺得有香港昔日大牌檔風味，以風味見稱，坐落唔會覺得舒服，而且日本冇話食肆禁煙呢回事，煙味隨風飄蕩，認真唔係左丁山嗰杯茶。
天神區大街馬路旁，亦有唔少晚間開業之熟食檔，情況就好似在國金二期外邊街道擺設大牌檔。點解市政府唔禁止呢？肥仔K話在六十年代日本高速發展時期，日本廢除咗好多舊事物，藉口係掃除發展障礙，但當時冇廢除，留到今日嘅，就一定唔可以廢除，因為好多團體會以本土文化、民俗、集體回憶等理由反對，政府唔敢輕舉妄動。大抵一個社會到咗富足階段，就冇咁想追求更多發展，反而更重視懷舊與傳統風俗，今天之日本更加如此，但如果過份保存舊物，只會令遊客高興，例如巴黎市區內，新住宅極度缺乏，只有舊租客可住在市區內，係青年人不滿社會嘅因素之一。