講開《GT5P》，不得不提凌志架ISF，環顧三十幾架對手，廠方居然只派呢架出戰，可見信心有幾大。日前代理凌志嘅皇冠車行就同SCEH搞咗個「飛馳GT5P凌志爭霸戰」，喺網上甄選過百機迷進行初賽，全部揸ISF出嚟鬥，呢日就係四強最後一戰。
可能大家玩開手掣唔慣軚盤操控，四強表現只算一般，基本上發揮唔到ISF嘅423匹超強馬力，最後由只得18歲嘅King奪得冠軍。講番真正嘅ISF，筆者左、右軚都揸過，對內櫳好有親切感，發覺Game入面ISF錶板真係跟真車一樣，而且中控台跟行貨嗰架一樣不設屏幕，皇冠車行方面就好有見地咁話：「落場砌，又點會有屏幕呢啲多餘嘢？」
記者：徐影龍
攝影：伍慶泉