亞洲航空（AirAsia）嚟緊5月首辦來往香港、吉隆坡嘅直航航線。有同事都訂咗佢哋嘅優惠機票，叫我醒大家一啲info，唔好到時大鄉里搭廉價機，撞晒大板咁瘀。
記住，亞航喺吉隆坡落地嘅機場唔同國泰、馬航，係用LowCostCarrierTerminal（LCCT），距離原有機場約半小時車程，有專車接駁兩個機場，不過，大家唔使專登搭車過去，因為LCCT都有巴士直達市中心，所需時間同另一機場相同，約一個鐘，收費約港幣50蚊，喺飛機上可以買定車飛。
叫得LowCost機場唔會有啲咩好行，大堂比較細，食肆又唔多，麥記直情好似銀行擠提咁排滿人。不過，細有細嘅好處，由checkin、過關到上機，幾乎都喺附近，唔使好似香港機場咁，行到腳痛。
仲有，亞航係不設劃位，大家要早啲去閘位等上機，但會有兩條隊，千祈唔好排錯，一條係畀額外付款優先登機嘅乘客嘅。我見到唔少人排錯隊，要從頭排過。航空公司人員執得好嚴㗎，因優先上機要畀多成港幣100元。最後奉勸廉航乘客有心理預備：「一分錢一分貨，唔係點會咁平喎。」
逢周一至周四刊出