工商銀行噚日公佈全年業績，而且透過視像系統，北京同香港同步進行，不過當北京嗰邊已經ready好、幾個高層都坐定定嘅時候，負責香港呢邊嘅董事長姜建清竟然唔見咗！
話說香港呢邊董事局秘書潘功勝試咪嗰陣，喺北京嘅行長楊凱生就以為記招已經開始，於是佢即刻開咪話：「有請董事長。」點知姜總都仲未到場，連潘功勝都唔知佢去咗邊，於是即刻打電話叫姜總出嚟。全場──包括北京嗰邊透過視像系統──都聽到佢好大聲咁攞住個電話講：「董事長你在哪？」場面十足十賣緊電話廣告咁！
幾秒鐘之後，姜總都即刻現身，但喺呢短短幾秒，已經令在場行家忍唔住大笑，有個行家仲好大聲咁話：「好gag呀！」不過華華最想知道，到底姜總去咗邊搞到咁遲呢？