噚日中資銀行股集體公佈業績，除咗睇到邊個老總最交足功課，仲可以睇埋佢哋舊年收咗幾多人工？
論資排輩，先講中行（3988）董事長肖鋼，佢07年嘅稅前總收入有167.5萬人仔，比起06年嗰陣嘅152.4萬，多咗15.1萬，即係加咗一成人工，算跑贏內地通脹。不過，單睇基本工資及津貼，06年肖總有64萬人仔，但07年就減到得番52萬，好彩酌情獎金增加25.7萬，去到96萬人仔。
比起母行，中銀香港（2388）總裁和廣北雖然𢭃嘅係貶緊值嘅港幣，但銀碼就吸引得多。和總07年度包括董事袍金、薪津退休金連花紅，一共𢭃咗842.6萬銀，比06年度677.6萬銀，多165萬，加咗24%。和廣北07年度雖然收少咗20萬銀董事袍金，但花紅收多118.2萬、薪津福利就多咗66.8萬銀。
梁錦松袍金加36%
另外，工行A股噚日亦出咗07年度年報，工行董事長姜建清07年度稅前總收入有179.5萬人仔，比06年多咗38%，人工同加幅都叻過肖鋼，睇番股價表現，H股工行（1398）07年成年升咗15.94%，中行就跌咗11.48%。就算講年初至今，雖然大家都跌，但工行跌7.14%，中銀就跌咗14.29%，咁你知點解人工有分別啦！
除咗董事長，前財爺梁錦松喺工行擔任獨立非執行董事一職，07年度𢭃咗51萬人仔，比06年嘅37.5萬，升咗36%，升幅唔夠姜總，但都多過肖鋼。
電郵：mailto:[email protected]