啱啱喺上個禮拜公佈咗靚業績嘅李寧（2331），勢估唔到一個屈尾十就伸手向市場攞錢，仲要成4億銀。市場消息話，李寧主席兼創辦人李寧以介乎19.3至20.4元，配售2000萬股舊股，最多套現成4.08億，幫李寧配售嘅係內需股大好友瑞銀。
用噚日升咗11.37%嘅收市價、即係21.45元計，配股價約有介乎4.9至10.02%嘅折讓。原本揸住成35%集團股份嘅李寧，喺減持後嘅持股量將跌至約33%。瑞銀位芬佬朋友同華華講，李寧減持所得嘅資金，主要會用喺慈善用途，同埋佢嘅私人投資喎！
大嗱嗱4億銀，真係幫得獎運動員每人打造一個半身像都仲得！有芬佬就好唔高興咁同華華講，李寧揀喺公佈完業績、股價有番少少起色之際賣舊股，都係想反應掂。不過，佢究竟想話畀大家聽，北京奧運對集團冇影響？定係股價𠵱家經已到咗頂呢？華華唔想作無謂嘅揣測，睇吓今日市場點睇好過啦！