台灣大選之日，左丁山人在福岡，住在君悅酒店（GrandHyatt），酒店電視有ESPN，冇BBC，只有CNN，都幾悶，日本電視台與CNN冇乜報道台灣選舉，即使有，亦唔夠詳細。後來想起大記者去咗台北觀選，於是打電話搵大記者，大記者話：「選舉投票甚為熱烈，但下午四時後先至報道點票及調查情況，我哋現在喺故宮博物院睇文物古蹟，好好睇。」到咗下午六時，再打電話搵大記者，佢話馬英九大幅度領先，除非有意想不到變化，贏面極高。後來再通兩三次電話，知道馬英九贏梗，先至冇再增加電話使費。
香港電話可以漫遊全世界，獨是在日本冇用。以往到日本前，預先向PCCW租定日本電話，覺得唔算便宜。呢次得肥仔K提醒，在成田機場買完火車飛（JR成田特急）去東京站之後，行多幾十米去一間叫做ABC嘅電訊公司租用日本電話，日租一百日圓，打日本電話，一分鐘一百日圓，打國際電話，一分鐘二百五十日圓，使用十分方便，離開日本時，在TerminalⅡ嘅ABC還機，快夾妥。
有個日本電話，去到東京站，雖然人頭湧湧，不辨方向，仍然可以打電話與肥仔K聯絡，在八重州出口會合，即買新幹線車票去大阪，一百六十分鐘之後到達新大阪車站，坐的士去大阪希爾頓投宿一晚。上房放低行李，急急落樓搭地鐵去心齋橋、難波一帶行街食壽司，街上行人眾多，廣東話隨處可以聽得到，GoodFriday前夕，香港客已大量殺到。醒起賓架P等亦會在復活節到大阪參加婚禮，本想約在大阪共吃日本餐，可惜佢哋遲一晚到，時間夾唔到，只得作罷。
次日吃過早飯，再上火車去福岡，計過車程係一百五十五分鐘，下午到達博多站，乘火車直奔君悅。此酒店位於一個大商場叫做CanalCity之內，係福岡市新興玩樂地點，內有戲院、ClubSega、百貨公司、拉麵城、體育城、百貨商場等等，可謂老少咸宜，至於可否與市中心天神丸區（大丸、三越、岩田屋三大百貨公司一帶）爭一日長短，則非吾所知也！