08北京奧運聖火前日在希臘奧林匹亞古競技場燃點，5月2日會傳到香港，屆時演藝界的陳奕迅（Eason）、陳慧琳（Kelly）和張學友等，將擔任火炬手傳遞奧運聖火，而楊千嬅就擔任澳門火炬手，幾位歌手均十分重視今次任務，Kelly已準備谷行「老鼠仔」迎奧運聖火，千嬅則每日舉重練氣。
今年8月在北京舉行的奧運會是中國人之光，距離奧運開幕只餘數月，前日聖火採集儀式已於奧運發源地希臘奧林匹亞古競技場赫拉神廟舉行，章子怡以觀禮嘉賓身份亮相，台灣男歌手王力宏則在可口可樂推薦下，獲邀到雅典擔任奧運傳遞聖火的首批華人接力代表之一。
Eason自豪
「做火炬手有使命感」
香港演藝界雖無緣到雅典見證聖火點燃，但當火炬傳到香港一站時，陳奕迅、陳慧琳及張學友將以火炬手身份，每人負責傳送200米的聖火。昨日陳慧琳談到獲邀為奧運擔任火炬手，表現得十分欣喜，她在電話中說：「真係幾開心，因為呢個係中國人嘅大事，我可以出一分力，覺得好光榮，由於我要跑成200米傳聖火，咁喺傳遞過程我一直要攞住火炬，手臂太鬆唔好睇，所以我要谷番隻老鼠仔出嚟。」
陳奕迅也謂作為中國人能擔任火炬手是一件值得光榮的事，近期已努力做好準備，他在電話中說：「做火炬手我覺得好有使命感，由於我要負責200米嘅聖火傳送，所以呢輪我好努力打網球練氣。對我嚟講跑200米完全冇問題，不過要揸住奧運聖火嚟跑，我就想跑得姿勢靚啲。而奧運喺北京舉行期間，我真係好想去北京睇女排同跳水項目，但到𠵱家都未買到飛。」
至於楊千嬅則會在5月3日於澳門擔任火炬手，昨日她接受電話訪問時說：「呢輪我每朝早都有跑步練氣，又做埋舉重，到時傳聖火兩隻手臂線條睇落會靚啲。中國第一次有機會搞奧運，作為中國人我當然好開心同光榮，所以我喺一年前已經訂咗12張奧運門票，準備返去睇女排、自由體操、跳水同4x100接力賽，雖然我有門票，但我仲未解決到住宿問題，因酒店全爆，如果搵唔到酒店，真係有飛都冇用。」
大會邀請奧運會火炬手的準則，於國內傳送火炬的要求是「熱愛祖國，熱愛奧林匹克運動」、「實踐北京奧運會舉辦理念，為建設和諧社會做出貢獻」、「在本行業、本地區做出突出成績，或自身經歷對於他人有教育和激勵意義」、「熱心志願服務，品德高尚，樂於奉獻」及「為推動奧林匹克事業的發展做出貢獻或在奧運會上取得過優異成績」；於國外傳送火炬的要求是「擁護奧林匹克精神、熱愛奧林匹克運動」及「支援北京2008年奧運會」等。
另一方面，前日章子怡身穿吊帶長裙在雅典見證北京奧運聖火點燃，今次她是受北京奧委會邀請到當地觀禮，還身兼全國奧運媒體聯盟特約記者，胸前掛着記者證的她，手拿攝錄機在現場四處拍，而從競技場到聖火採集地的赫拉神廟路上，中間有一個保安森嚴的警戒區通道，因章子怡胸前只掛了記者證而非VIP證，故當她欲走到赫拉神廟採訪時，不獲當地保安放行，她經過一輪交涉後，仍無功而還。
名人明星
義拍宣傳片招遊客
此外，為宣傳8月在港舉行的奧運馬術比賽，陳奕迅、楊千嬅、莫文蔚、甄子丹及李麗珊等10位藝人及運動員，特別免費為旅發局拍攝宣傳片段，昨日陳奕迅以一身球衣打扮，在南華會足球場進行拍攝。除了陳奕迅以足球員打扮亮相外，甄子丹會在宣傳片段中以騎馬造型亮相，莫文蔚則會打拳擊及介紹中環蘭桂坊，千嬅也會跑步及打邊爐。這段合共約30分鐘的宣傳片將在下月15日起於AXN頻道播放，以吸引東南亞地區旅客來港。
採訪：葉雪
話你知：明星火炬手現四地
傳送奧運火炬一直被視為神聖任務，挑選火炬手的過程相當嚴格，今年北京奧運也有不少知名藝人入選火炬手之列。
《傳送火炬明星》
香港：張學友、陳奕迅及陳慧琳
澳門：楊千嬅
內地：李宇春、趙本山、黃聖依、李冰冰及張靚穎等
希臘：王力宏
全城熱話：港名人追捧跳水
隨着奧運聖火前日在希臘燃點，08北京奧運氣氛越見熾熱，香港名人界和娛樂圈更掀起一片撲飛熱潮。
陳豪
最想睇項目：自由體操、游水、網球、馬術
「我都有搵朋友幫我撲飛，但聽講啲飛炒到4、5倍，原本一套8千幾蚊嘅門票炒到幾萬蚊，同埋到時可能有工作在身去唔到睇，所以多數都係睇電視直播。」
趙世曾
最想睇的項目：籃球
「我過去兩、三屆都有去當地嘅奧運會場度睇，因為咁先夠氣氛。我一定睇嘅就係籃球，世界籃球總會會長係我朋友，每次都會留票畀我睇，場場都有啲票咁，我同朋友一齊去睇啦。我已經訂咗Hyatt，好早前訂，住宿使費大約10幾萬啦。」
顏福偉
最想睇項目：跳水、乒乓球
「跳水同乒乓球方面嘅體育明星我比較熟啲，好早之前我問過朋友有冇飛，但淨係可以睇到opening綵排，聽講每個國家都有啲門票嘅quota，𠵱家惟有睇吓其他地方買唔買到飛。」
王賢誌
最想睇項目：開幕典禮、跳水
「原本我爹哋（王忠桐）有兩張開幕禮門票，點知佢唔要送咗畀人，後來我同佢講想搵飛嗰陣佢先至話番畀我知，激鬼死我，𠵱家睇吓佢可唔可以再幫我搵兩張開幕禮嘅飛。」
賭王四姨太梁安琪
最想睇的項目：開幕典禮、跳水、體操
「北京辦奧運係國家大事，當然去睇啦，我最想睇係開幕禮，好期待，其次就係跳水、體操，希望中國可以攞晒跳水金牌。」