孫耀威、張敬軒同台灣歌手潘瑋柏前晚喺灣仔會展演出「新城唱好極品好男聲音樂會」，其中孫耀威同軒仔都各自唱到甩嘴又唔啱key，錯漏百出，之後三人合唱《笨小孩》，軒仔又甩晒嘴，要孫耀威提水。
玩曖昧斷背情
之前軒仔綵排遲到仲大鬧公關，事後俾人話佢態度囂張，佢解釋話：「我因為病咗，搞到EQ都低埋，可能係服用過量藥物影響，所以小小事就發脾氣。對於鬧公關件事，覺得好後悔，我入行以嚟冇試過遲到，估唔到咁多年嘅貞節牌坊就咁打爛咗，我只係想搞清楚件事，所以搵公關問吓，我嗰日脾氣唔好，連王菀之都俾我鬧咗一餐，我都覺得自己好似巴士阿叔咁，生人勿近。」
孫耀威就男女都啱，除咗有女fans上台送花，當孫耀威話想搵人幫佢撥走身上嘅紙碎時，軒仔就好細心咁幫佢撥走，最後仲嚟個抱抱㖭。事後有人笑孫耀威男女都啱𠝹，孫耀威話：「Fans係我嘅衣食父母，如果有好嘅女fans都唔介意一齊㗎。」佢又話費事同軒仔傳緋聞，在旁嘅軒仔搭嘴話：「你就想喇！」