07年股市樓市都咁好景，唔少打工仔都有人工加，咁身為上市公司高層，又點會冇份。東方海外（316）主席董建成，同埋執行董事董立新（即係前特首董生個細佬同個仔），07年都加咗人工，但同人唔同命，做阿叔嘅收入勁升五成，做姪嘅就加得4個巴仙多啲！
睇番東方海外份熱辣辣嘅年報，董建成07年𢭃咗268.7萬美金人工，折算為港銀接近2100萬銀，比起之前一年177.3萬美元（約1383萬港元），多咗700幾萬港銀，主要係酌情花紅多咗接近94.8萬美金（折約739.4萬港銀），唔少打工仔要搵好耐先有呢個數！
至於董立新07年總收入有40.5萬美元（約316萬港元），同06年嘅38.8萬美金（約303萬港元）相比，係咁意增加咗13萬港銀，即係每個月加咗萬零銀人工，高層之中，算加得少。