成日捐錢起學校嘅工業家田家炳，單單喺香港，已經有超過150間學校以佢命名。噚日佢又再捐錢，今次受惠嘅係城大，城大學生為咗多謝佢，就作咗首詩嚟歌頌佢。
田家炳今次總共捐咗300萬畀城大，加埋政府嘅等額配對基金，成個「田家炳教育基金」就有成600萬銀。城大署理校長何炘基喺致辭時話，春天已經來臨，今次田博士親身出席，好似春雨甘霖咁帶嚟希望，佢自己仲畫咗一幅題為《迎春曲》嘅國畫，送畀田博士㖭。
不過令華華最估唔到嘅，就係城大嘅繙譯博士生崔英，特登作咗一首叫《春風》嘅詩送畀田博士，內容係話田博士好似春風咁滋養萬物，大會仲特登安排咗一班學生（圖右）手舞足蹈咁朗誦呢首詩，田博士一路聽一路開懷大笑，可想而知班學生𠱁得佢幾咁開心！