噚日沙田跑日馬，大概因為好多馬主趁復活節離港外遊，會員席唔算好熱鬧，不過兩代政務司司長肥龍同唐唐，就行孖咇出現，原本唐唐隻愛駒「富士晨曦」有報名出賽，但因為健康問題，響排位前退出，佢惟有改幫第六場肥龍隻「有聲有色」打氣，兩人喺馬匹亮相圈傾到雞啄唔斷。
話時話，肥龍隻「有聲有色」確係幾叻，跑到家陣八歲高齡，今場仍可交出水準，放到最後幾步先頂唔住，仍保住一席亞軍，取得12萬9千幾蚊獎金，累積有5冠10亞7季咁多。
上個馬季唐唐同肥龍夾份買咗隻灰馬仔「大師」，𠵱家四歲年輕力壯，出賽九次連三甲位置都冇，最近一場得第五名，已係歷來最佳，但獎金只夠半個月養馬費。