復活節長假期放完，不少散戶都對港股能否在假後「復活」懷有好大的期望。講真，大家都係炒股票之人，梗係想個市氣氛好轉，一掃過去幾個月以來的淡風。
目標價18元
不過，期望還期望，現時港股挨近21000點水平，坊間大部份人對後市普遍睇得較淡，幾乎睇死港股今個跌浪必定要試一試兩萬點心理關口，甚至要重返去年8月17日低位才有望完成調整。星俠唔想潑冷水，但事實上「估底」從來係智者所不為，身在股海，只會順勢去等大市提供答案。
油價由高位大幅回落，一眾航空股全線俱見「起飛」，因升勢剛起，有留意價值。若論幾隻航空股上周四升幅計，國泰航空（293）升得最少，如果比數據，國泰PE8倍左右，息率又有成5厘以上，應屬同類股中最好一隻。國泰股價一度升破10日線，現價報14.98元，可買入，博其突破下跌通道展開反彈升浪，目標18元，跌穿13.82元止蝕。