復活節飛台北機位爆晒，除咗趕返去投票嘅台灣人，據「非正式統計」當中唔少係香港記者。除睇大選去藍綠兩派陣營總部，就連港台兩地機場、誠品書店、西門町，撞口撞面都係行家，搞到大家以為自己冇放假。有老行尊講，今年可能係最多港記：「做記者梗係想見吓大場面，等到香港普選，可能我哋都老喇。」
究竟港記點樣多法？有香港某報記者去到台灣新聞局攞工作證，俾新聞局職員望住張記者證話：「嘩，你們報社已有近二十位記者來拿證了！」好多行家都趁放假去觀戰，做遊客之餘，遇到重要新聞可以馬上向香港報料。
女記者借位扮合照
連日來，藍綠兩營造勢晚會、藍營祝捷晚會都見到班港記跑來跑去，有台灣記者忍唔住講笑：「你們可能比我們更多！」喺馬英九當選總統翌日記招上，小馬哥甚得港記歡心，好多行家過去同佢握手，有幾個女行家仲借位扮影合照㖭。
八方又發現，兩陣營都不約而同推出競選紀念頭飾，同廸士尼有啲相似，寫上候選人個名嘅耳朵部份仲有閃燈。如果戴住呢個頭飾去廸士尼，唔知會唔會被追究侵權呢？