馬蕭配大勝，即刻話要感恩又要謙卑；長昌配慘敗，鞠躬道歉話辜負民眾期望。台灣總統大選結束，一眾組團去台灣觀戰嘅泛民主派成員噚日陸續返港，但佢哋此行都患上「流口水」後遺症，當中以民主之父馬丁最嚴重。佢哋唔係俾台灣美食搞到口水失控，而係眼見台灣一人一票嘅民主制度越嚟越成熟，反觀香港遲遲冇普選，真係恨死隔籬。
馬丁噚日喺台北機場臨上機返港之前，同八方分享呢次台灣之旅。佢話今次最令佢感動嘅，係睇到台灣人可以一人一票之餘，成個選舉過程雖然有少少火花，但最終勝者贏得精采、敗者亦輸得得體，冇出現類似上次阿扁子彈事件嘅小動作，反映民主制度越嚟越成熟。
會全面追上香港
馬丁爭取香港民主多年，佢慨嘆話，論受教育程度、論法治，香港都唔差過台灣，但由88年爭取直選到今時今日，都仲未有普選，2017年阿爺只係話「可能可以」普選特首，諗落都要嘆十聲。
佢仲話，台灣唔係一開始就有咁成熟嘅民主制度，都經過咗四次選舉先至有咁嘅成績，如果香港仲再唔快啲起步，遲啲台灣喺小馬哥帶領下，搞掂埋最弱嘅法治一環，咁台灣就會全面追上香港，到時香港就真係醜死鬼。
同馬丁一齊去台灣觀戰嘅民主黨主席何俊仁就話，今次雖然飛咗去台灣，但佢怕人多，所以最終都係留喺酒店房間睇電視直播，但已經令佢羨慕到牙癢癢。至於留守香港，為支聯會六四晚會做宣傳嘅華叔，噚日就話今次台灣選舉，清楚證明喺民主制度之下，如果領導人做得差，人民自然就會用選票令佢落台、迫佢反省，唔似香港只靠阿爺話事。
靠阿爺而唔係靠普選，少不免會令人不自覺咁自我膨脹。龍應台喺台灣大選前三日，寫咗篇文章，題為〈給我們一個政治家〉，佢提到台灣人需要嘅總統，係一個政治家而唔係政客，「他不必是聖人，但……小學生在寫『我的志願』時，還可能以他為人生立志的效法對象。」大勝之後嘅小馬哥一直表現得誠惶誠恐咁，最終能唔能夠成為佢筆下嘅政治家，仲要睇未來政績；但至少唔似得煲呔當年參選時喺職業一欄，自己話自己係「政治家」咁肉酸。民主令人謙卑，大家睇到啦！
mailto:[email protected]