前排玄學家麥玲玲同農夫Rap咗首《風生水起》，首歌畀佢哋三個唱到街知巷聞，但係聽講向來同麥師傅唔係咁咬弦嘅李丞責，似乎唔多讚賞呢位行家嘅出位表現喎！
點知最近有報道話李丞責俾黃柏高睇中，遲啲會合作搞個「風水版棟篤笑」，噚日喺TVB嘅《玄學天王》記者會，見到麥師傅同佢講開呢件事，佢話自己都睇周刊知道呢件事。
麥師傅仲笑笑口咁話：「呢樣嘢都幾有吸引力，聽講佢（李丞責）仲會唱埋歌㖭！講到唱歌同拍戲，佢比我更加早嘗試啦！其實同一班歌手玩吓crossover都冇乜所謂啫，但係就唔好自己一邊做一邊話人哋唔啱囉，我真係覺得呢個做法就唔係咁好嘅，所以我都要去TVB搵樂易玲同珍姐傾吓，唔好蝕呀嘛！」
緋聞男女屋企對稿
另外，曹敏莉同黃長興噚日都有份出席活動，喺台上介紹節目內容嗰陣，大家都取笑黃長興講錯內容，仲笑話如果係法文嘅話就完全冇問題，點知護「興」情切嘅曹敏莉，就口快快自爆已經喺屋企同佢練定，事後曹敏莉仲死撐話：「你哋聽錯嘞，我係話喺後台同佢對咗稿呀!」
