《天龍八部Online》無論係對遊戲迷或小說迷來說都夠晒號召力，只係掛起金庸小說牌頭已經吸引力非凡。可能眼見中港台三地金庸迷數量驚人，《天龍八部Online》三地版本將會獨立運作，與一般網遊要港玩家登入台版進行遊戲不同，同時解決不少lag問題，相信可令玩家打得更暢快！
記者：許福合
九大派任選
大部份網遊都脫不出練功、打寶的基本框框，《天龍八部Online》亦無例外，生活於險惡江湖之中，當然要有好身手先有能力行走江湖，不過今次人物強弱除咗睇等級、裝備外，仲包括埋技能級數。特別之處係經驗值升滿之後，10級以上人物不會自動升級，玩家可選擇將經驗值投資在技能等級上；所以要訓練一隻強手，等級同技能都要顧及，一味衝等級但只有弱招，練功只會加倍吃力而已。講起技能，遊戲內玩家可選擇加入九大門派，如少林、峨嵋、武當、丐幫等，各自可以學到不同招式的武功，最過癮係各門派都有自己的服飾，自己人一眼就認到。
養寵物陪練功
好多網遊都有類似養寵物的玩法，《天龍八部Online》的寵物類型就有不少種類，而寵物素質亦可以好考究，一隻好的寵物練功時亦係好助手。遊戲內更提供寵物配種，玩家有機會將兩隻弱小寵物配種成質素高幫手，令整個系統玩法豐富不少。《天龍八部Online》遊戲內場景及地圖都非常大，所以加入了一個導航系統，只要於小地圖上揀選目的地，角色就會自動移動到指定地點，對於新加入遊戲玩家絕對係好幫手，不用浪費時間於新地圖上摸索。
經典故事易投入
《天龍八部》可以話係金庸其中一部最受歡迎小說，亦多次改編成電視劇播出，相信大家對故事都有一定認識。《天龍八部Online》背景建立於小說上，雖然玩家並非飾演小說內角色，不過卻可以體驗到小說所建立起的江湖世界，同時亦有機會遇到小說中曾出現角色！畫面方面，採用半3D遊戲畫面，不過大部份場面都仍以2D畫面顯示，雖然無全3D遊戲的畫面多變化，不過《天龍八部Online》算是達到現時2D畫面優化極限，尤其戰鬥效果相當理想。
送50個封測帳號
《天龍八部Online》現正進行封測，不過並非人人都有機會參與。筆者就見唔少人於各大遊戲討論區索求遊戲封測帳號，但因數量有限，好多人自然失望而回。今日《數碼達人》聯同代理Gameone送出50個封測帳號予讀者，大家只要電郵至mailto:[email protected]，註明「數碼達人索取《天龍八部Online》帳號」，頭50名讀者就有機會免費獲得，率先打個夠本。
Profile
遊戲類型：MMORPG
開發：搜狐
代理：Gameone
收費：免費（商城）
公測日期：4月中
官方網站： http://tl.gameone.com/
