可能因為要服兵役，台灣男人「佬味」重啲。我睇咗「非常林奕華」舞台劇《水滸傳》，台灣演員張翰係表表者，佢係張震阿哥，個樣都幾掂㗎，拍過《牯嶺街少年殺人事件》。
同事嘉雯都好冧台灣男士，復活節我哋去台北玩。佢早過我到，我去到就收到佢sms，叫我幫佢喺機場買台灣手機儲值sim卡，佢話：「台北車站、西門町都買唔到！」
「台灣大哥大」機場專櫃sales話買儲值sim卡要登記護照，一張卡300元台幣（港幣75元），有449蚊台幣（港幣112元）通話費，打當地電話1分鐘約6元台幣（港幣1.5元），當地接電話係免費。sales話最好喺機場買卡，因指定分店先畀遊客買。
台灣觀光協會香港辦事處主任王春寶事後講，台灣人或遊客買儲值卡都要登記身份證明文件，因為如果用張卡犯罪都有得追，增值就唔使睇證件。
逢周一至周四刊出