上個禮拜銀行跟隨美國減息，雖然唔跟足，但都減半厘，計埋通脹，擺錢喺銀行只有不斷縮水，敏妮身家已經有限，再縮一縮，日後想退休都幾難，所以投資人民幣大計事不宜遲。不過，講就易，做落都幾麻煩，好多人都知，兌換人民幣有限制，一日最多只可以兌換2萬蚊，雖然5000蚊人民幣都可以去做人民幣定存，但敏妮原意係唔想見到啲錢喺港元存款戶口日日貶值，所以敏妮十足電影《舒特拉的名單》咁，「救」得幾多就幾多，雖然敏妮唔算身家豐厚，但要將大部份嘅錢（咁都要留啲嚟做流動資金）轉做人民幣，都要搞好多日。
銀行擘價闊唔抵
光頭仔知敏妮搞緊港元存款大逃亡，就提醒：「敏妮，銀行外幣滙率擘價好闊，喺銀行兌人民幣唔抵。」敏妮第一時間話：「吓，唔通要日日拎兩萬蚊過海去上環牛記，換完錢再存入銀行，車錢都蝕埋啦！」家住西環嘅光頭仔好熱心話：「你唔記得我住西環咩，我揸車返工兜一兜過去，好方便。」
敏妮唔係唔信光頭仔，只係據敏妮記得，牛記店前好似唔泊得車，若果光頭仔幫敏妮換錢時食張牛肉亁，蝕水固然無謂，日日麻煩光頭仔就更唔想，要知時間都係成本！
喺網上做着數多
其實，喺呢啲情況，網上銀行就發揮到佢嘅優點，好多銀行都想減省前線人手嘅成本，所以力谷啲客用網上理財，好多銀行透過網上兌換外幣，滙率會吸引啲，或者定存利率會高啲，好似敏妮用開嗰家銀行，做6個月、1萬蚊人民幣定存利率0.75厘，如果喺網上做就有0.8厘。
另外，敏妮只需要上網set定每日兌換幾多錢，做幾多日，咁銀行就自動波，敏妮諗住盡快兌換啲錢，所以冇設定目標滙率，其實你可以設定目標滙率。
雖然1萬蚊港元定期6個月網上做都有1.2厘，多過人仔定存，但要知道港銀貶緊值，相反人民幣年初至今已升咗超過3%，一般估計，人民幣今年起碼都升一成，相差幾十點子利息，算啦！
http://wanmanli.com/blogs/