青姐胡孟青成日都狠狠地鬧嗰啲唔做功課就走去買股票嘅股民，網友calviane唔知係咪怕俾青姐鬧，所以好乖咁喺香港討論區度，問吓啲網友「洛陽鉬業（3993）生產嘅鉬係用嚟做咩？」
網友水不拉好好人咁話佢知，鉬係用嚟做不銹鋼嘅，網友侯琴睇到calviane咁問，就讚佢「正確投資態度，值得支持」。不過，calviane呢個問題就引起其他網友反思，齊齊問：「咁咪要返大陸食枝蒙牛嘅冰淇淋，先可以買蒙牛（2319）！」亦有網友話：「咁我咪要試帶胸圍？我持有黛麗斯（333）喎？」
睇嚟如果各位股民要咁樣做功課，喺抽旺旺（151）之前咪要試吓食咗旺旺係咪真係咁旺，買滙源果汁（1886）時又要試吓啲果汁囉？如果要買中石油（857），係咪又要揸架車去入吓油呢？不過點都好，買股前做足功課，了解多啲公司業務，呢種正確嘅投資態度係抵讚嘅！