初哥由潛鏡開始

復活假前有朋友本來雄心壯志到菲律賓學潛水，已經去到四個樽的階段，豈料半途而廢。想了解清楚，點知朋友硬係不肯說原因。走去問資深潛水攝影友DennyWong，得出兩個字結論：「驚死！」新手要由基礎學起，否則潛鏡亦可以將你玩死。

攝影︰王文忠
潛水攝影︰DennyWong
http://appleblogpaper.blogspot.com

■嘩！又大又紅。平日大眼雞我就見得多（主角身後那兩條）。

■這種蝶魚，行過旺角魚街也見到，但當然潛水時見到是另一種風味。

■巨鰻殺到，好似睇緊DiscoveryChannel。

aboutme：Six_Bears

喜歡舉一反三，有反建制的衝動，一度幻想自己是Mod友，付諸實行買下綿羊仔就當立下豐功偉績。實質不學無術，乜都想試，捨身潛水飛車，或至花盡銀彈飲紅酒；遇財政緊張，轉頭自閉煲經典動畫，一樣快樂過神仙。

初學唔慣鼻下有水

Denny講過話，學潛水，花六至八個樽一定得，唔會出現「死磨爛磨」。「唔會有人花多別人一倍時間（12個樽）還繼續學下去。當試水多次後，仍然唔習慣用口呼吸，影響平衡，你會驚至中途放棄。」窒息令人恐懼，曾經有朋友學到四個樽時決定放棄。所以一直都唔Buy那些去菲律賓，花三至四日時間順道學埋潛水的旅遊大計。何解唔在香港先學一半，花兩個樽落Pool適應，Pool都唔得豈用談大海？
潛水大前提唔係勇氣，而係安全，對基本裝備有認識是初學者必須要做的事。潛水鏡下面有個鼻囊，好多初學者給它考起。「潛鏡不可能百分百唔入水，特別是鼻囊位，初學者最唔習慣。想像在水入面鼻子一索，你會明白何解驚死到要放棄。」其實當學到兩至三個樽時，應該已習慣有水在鼻孔下面，更學識因水慢慢入鏡，你在鼻囊內噴氣可將水推逼到鏡外。負責任的教練會教學員唔好貪平，買一些裙腳太硬的潛鏡。因為噴極氣都入水，嘥錢嘥氣。

注意膠邊柔軟度

識買潛鏡和識得保養，其實為荷包慳唔少。「要試潛鏡過程其實好簡單，最重要是講貼唔貼面。先吸一啖氣，再將潛鏡戴上，搖搖頭，看潛鏡有否鬆脫。」成人用潛鏡，事實價錢範圍好窄，$400至$800已有好貨色。先前提過「裙腳」，實指貼住面那條膠邊，因此柔軟度唔夠的話易入水是理所當然。「裙腳用得多會硬化，同潛水攝影用的攝影殼那條膠條同一道理。」雖然我對海水含甚麼成份導致塑膠產生甚麼化學反應沒有研究，但看到家中海水魚缸內吸在玻璃上的膠吸盤日趨硬化，就知是必然定律。Denny話唯一解救是用淡水洗和不要用太陽曬亁。

Denny舉例：去到一些小島潛水，「好多人潛完返上島後，用水喉水洗完就算，但其實那些水是海水化淡出來。」腦內叮了一聲，因為我平日也是洗了就算的人，喜歡聽Denny的潛水經正因為他很多細眉細眼位，一個小島無情情不會有自來淡水。還記得他有次示範一種最原始的潛鏡防霞法，就是直接吐口水到鏡上捽。「其實跟用防霞液或牙膏一樣道理，那層薄膜含相似的化學物質。不過被人話過我好多次核突後，現在戒了用口水。」我信他這個老方法，多過信甚麼塊鏡有防霞功能，十呃九騙。

■意大利Mares，特大視野，裙腳兩層膠質設計，藍層硬少少，透明層超柔軟，售價$810。

■日本Apollo，金屬框保護性強，但記得要用淡水洗淨，售價$920。

■美國Scubapro，泰國製有側鏡設計，Simon用沒有側鏡的，售價$420。

■日本Serene，視野大、粉紅框，好明顯女士專用，售價$470。

■同樣是日本Serene，側鏡設計而且是曲面，有放大效果，售價$520。

■意大利Cressi，比起Scubapro大視野，最重要夠貼面，售價$550。

潛鏡越玩越大

「揀鏡還要揀玻璃鏡，而且是一爛全碎的玻璃鏡，購買前應該看到鏡上有貼紙寫明。」這也是安全問題，唔會留𠝹口邊，一碎就玉石俱焚。看現在的潛鏡也越出越大，我也覺得自己那個太老套了。「大視野是趨勢，有些連鏡側也是透明玻璃，睇多一點。」有次跟有搞埋潛水訓練的紅酒軒Simon也講開這類鏡到底有沒有實際用途，哈，但我倆覺得落到水仍舊習慣視線向前罷了，買個大視野的已經夠用。

不過有類人需要用它們，就是那些落水後粗心大意兼沒有環保意識的。看他們一腳就踢到珊瑚，再一屁股四腳朝天壓在珊瑚上，真想揪他們一頓。所以話，有錢也要玩得有品。

售賣點︰

地址︰尖沙嘴漢口道19-21號漢宜大廈1樓D室
查詢︰27241322