早年憑電視劇《戇夫成龍》人氣勁升的郭晉安，前晚一索得男，其妻歐倩怡為他順利誕下重6磅6安士的男嬰，母子平安。陪伴太太入產房生產及拍DV的安仔，在目睹兒子出世一刻感動得流下男兒淚，由於夫婦二人均十分喜歡荷李活型男畢彼特（BradPitt），故特意將囝囝的英文名取為Brad。
現年43歲的郭晉安與28歲的歐倩怡，前年7月22日在香港廸士尼舉行童話式婚禮後，去年11月安仔宣佈太太懷有身孕，預產期為下月中，不過腹大便便的歐倩怡前日凌晨時分突然穿羊水，安仔即第一時間送太太到九龍浸會醫院生產，結果夫婦二人一索得男，歐倩怡於前晚為安仔順利誕下重6磅6安士男嬰，母子平安。
興奮流淚
陪入產房親拍DV
安仔於昨日下午約5時離開浸會醫院返家休息，戴上口罩的他雖然滿面倦容，但言語間仍難掩初為人父的興奮。安仔說：「太太係自然分娩，比預產期早咗兩個星期，23號凌晨太太穿羊水，我提醒自己要保持清醒，跟住送咗太太入醫院，入咗病房5個鐘左右，BB喺噚晚出世，老婆好叻，陣痛嗰陣冇叫到，留番啖氣生嗰陣用。」
問到安仔初為人父的心情如何，及有否入產房陪產時，安仔說：「我有入產房陪太太生BB，拍埋DV，我同太太都好開心、好興奮，見到BB嗰陣好感動，覺得生命好奇妙，自己人生去到另一個階段。」問他有否感動落淚時，安仔笑道：「都有兩嘢㗎！」
再問安仔是否已經為B仔改名時，他說：「中文名未改，英文名就叫Brad，因為我同太太都好鍾意BradPitt，而且Brad呢個名仲有寬宏大量嘅意思㖭。」究竟BB似父親還是母親？安仔笑說：「屋企人話BB個樣似媽咪，個嘴就似我，但我覺得冇話似邊個，BB個樣都未定，好似今日咁又唔同咗。」
滿面倦容
照顧太太睡眠不足
安仔表示早在太太懷孕期間已不停睇書，為升任父親做好一切準備，所以太太待產期間他表現得十分冷靜，而他本來要為無綫拍攝新劇《真心英雄》，但公司方面已給他兩日假期陪伴太太及B仔，由於太太康復得快，預計兩、三日後可以出院。
記者問安仔有沒有請工人照顧太太及B仔時，他說：「我外母會陪佢。」昨日見安仔倦容滿面，他也承認連日來休息不足，他說：「呢兩日瞓唔到5個鐘，因為要陪老婆，要定時同佢量血壓，同佢check住，因為好擔心，食嘢方面都要好小心。」安仔昨日將一家三口的照片發放給傳媒，照片中B仔張開小口的樣子精靈可愛，而歐倩怡產後精神也相當不俗。
採訪、攝影：張俊銘
相士話：高智慧桃花旺
歐倩怡前晚為丈夫郭晉安誕下兒子，堪輿學家區仲德指男嬰的命格屬陽水，智慧相當高，預料將來會在娛樂圈發展，他昨日在電話中說：「BB嘅命格屬陽水，智慧好高，分析力同管治力都好強，將來會係一個好有權力嘅人。另外，佢嘅命格有兩柱桃花，人緣同桃花都比較旺，佢嘅運勢喺佢20歲會到，好有機會入娛樂圈發展。」
話你知：星級BB星級命名
甄子丹兒子James
他表示因喜歡看占士邦（JamesBond）系列的電影，故為兒子取名James。
李克勤兒子Ryan
克勤為兒子取名Ryan，以向他崇拜的曼聯球星傑斯（RyanGiggs）致敬。
謝霆鋒兒子Lucas
稱Lucas名字短小精悍，有指他向大導演佐治魯卡斯（GeorgeLucas）致敬。
資料來源：《蘋果》資料室
