財爺鬍鬚曾喺財政預算案大手筆派糖後，成功谷到自己嘅支持度超越特首曾蔭權，趁復活節假期喺屋企閉關煲碟，一口氣睇咗四套70至90年代嘅陳年舊片，最近期嘅一套都要係1996年嘅產物。八方幫佢計計數，四套戲夾埋片長接近400分鐘，即係超過六個鐘，鬍鬚曾咁得閒，但八方記得舊年立法會補選期間，佢就以公事忙碌為由唔見陳太。
講番鬍鬚曾今次睇嘅片，主角唔係同主流社會搞對抗，就係打打殺殺嘅拳擊同戰爭片，佢想做未來特首已經係司馬昭之心路人皆見，好明顯佢睇到自己民望勁，要維持高昂嘅鬥爭意識，Fight低其他跑馬仔人選。
不忘晒劍術
四套電影之中，鬍鬚曾話《天涯浪子》（FiveEasyPieces）已經睇咗十次以上，佢喺網誌中話，片中最為人津津樂道嘅一幕，就係主角去到一間路邊餐廳，因想點一份菜牌上冇寫嘅多士，受到「按菜牌辦事」嘅侍應諸多留難，呢一幕主要係講個主角唔肯跟傳統規矩做事，點都要得到自己心目中嘅嘢，反映60至70年代年輕人嘅反叛精神。套戲反映我行我素嘅鬍鬚曾，爭取上位做特首嘅鬥心都唔弱。
鬍鬚曾睇嘅第二齣，係《最後的摩根戰士》（TheLastoftheMohicans），套戲講英法兩軍1757年在北美洲爭奪殖民地嘅戰爭，當中最吸引鬍鬚曾嘅，係英法兩軍都背信棄義，但印第安人則忠於朋友。呢套戲寓意明顯不過，就係鬍鬚曾要講畀阿爺知，要同前朝英國佬及佢曾長時間交往嘅美國佬劃清界線，皆因佢哋都係衰人，至於邊個係印第安人？除咗煲呔好似搵唔到邊個同佢關係咁好。
鬍鬚曾睇嘅另一套片叫《一代拳王》（WhenWeWereKings），佢話主角拳王阿里畀佢嘅印象，雖然好輕佻同不羈，但事實上係一個勤力、細心、認真、做事很有計劃的人。鬍鬚曾曾經學拳，擺明係個人投射。
復活節檔期鬍鬚曾睇嘅第四套係冷門電影，1977年嘅《決鬥的人》（TheDuellists），當中講述拿破崙軍隊中的一名軍官，不停搵另一名軍官決鬥，由佩劍、軍刀以至手槍都成為決鬥工具，主角表現出屢敗屢戰精神，表明鬍鬚曾「點玩都奉陪」嘅鬥心，係向其他有意選特首嘅人先旨聲明。鬍鬚曾最後不忘showoff自己嘅劍術，話片中多場劍擊手法同步法都好正統喎。
mailto:[email protected]