中石油（857）公佈出奇地差嘅業績後慘被洗倉，此股作為上游石油股之一，油價升都唔受惠，明顯係國策所致，成品油無得加之餘，油價高企卻要徵收暴利稅，變成雙重損失，既然中石化（386）獲賠償補貼，中石油的煉油業務為何又沒有？現在看來，畢菲特早沽早着，不得不佩服其過人眼光。
交投疏只宜細細注
業績期也不是只有驚沒有喜，國內網絡遊戲股網龍（8288）上周四收市後公佈去年全年業績，錄得股東應佔純利3.75億元（人民幣．下同），較06年同期增長7.74倍，每股盈利85.01分，派末期息0.4元，將近一半盈利派作股息。現價計，網龍PE僅10倍，股息率將近5厘，一隻創業板股有無咁筍？
網龍作為一隻純網絡遊戲股，收益好受旗下遊戲受歡迎程度影響，有玩過網上遊戲都知，現時Onlinegame可說是百花齊放，競爭大，要突圍而出並不容易，幸好國內對網絡遊戲需求極大，而且投資成本唔高，呢門生意雖然多人爭，但只要發展上軌道並且不斷推新遊戲，賺錢能力應該可以保持。
事實上，網龍上市後股價狂跌兼潛水，現價較招股價13.18元仍低逾三成，公司集資又未有特別投資，惟有不停回購股份，提高每股盈利。有咗一定盈利基礎，網龍隨即宣佈，建議以介紹形式轉往主板上市。網龍股價弱之餘成交亦疏，試過全日得7萬大股成交，因此增加流通量亦係好重要，轉上主板應有一定幫助。此股潛力或被低估，但只宜買少少博大堆，非短炒選擇。
炒三通概念變真實
台灣總統大選小馬哥順利得勝，而且是以逾220萬票大幅拋離，取得壓倒性勝利，台股亦在周一開市大漲。香港的兩岸三通概念股，老實說是選擇有限，不過最新消息是兩岸三通已不是概念，小馬哥已定出時間表，最快7月可實現「周末直航包機」，年底更試行每日直航包機，向大陸開放14個機場港口。三通受惠股，今日必炒東航（670）及廈門港務（3378）。