港股上周四復活節假前最後交易日，大散758點，當晚美股生性，急漲262點。假如昨晚美股太平無事，港股今朝點都會有多少復活。
港股假期內，國內股市開多兩個交易日，唔多靚，相信對港股影響有限。港股跟歐美股市走嘅可能性大過跟大陸股市走。
年初至今為止，恒指跌24%，跑贏恒指大隻股有滙控（005），上周四收120.70元，單日跌1.10元，年頭起計只跌8%。滙控似乎逐漸擺脫次按影響，走勢矮仔上樓梯，要睇好啲，一兩個月內上返130元，有機會焉。
■滙控C輪9186係半新輪，1月尾掛牌，現價0.233元，今年9月9日期滿，價內，行使價99.90元，溢價只係2.1%，槓桿率5.2倍，有效4.1倍，引伸波幅38.2%。爆炸力係弱些少，但萬一大市或滙控再有三長兩短，撞板亦不會傷得太重。
港交所輪6638溢價低
港交所（388）跌到118.80元，已經低過去年9月7日158元（港府入市首日見光）將近40元，毋妨細細注搵隻C輪玩玩，博正股反彈。
■港交所C輪6638今年6月2日期滿，行使價100元，亦係低溢價貨色，僅2%，槓桿率5.6倍，有效4.5倍，引伸波幅50%。溢價低，對正股變化，反應容易跟到貼。