在馬場碰到一位馬會高級職員，佢於業餘時間跟葉漢良學紫微斗數及玄學，成班同學覺得好好玩，起碼對人生在世，冇咁執着，比以前更加虛懷，睇得開，生活更開心，至於如何睇星星，如何算運程，猶其餘事也。
講開斗數葉，斗數葉就到，佢每日興之所至，周圍行，呢日行到中環，經過左丁山辦公室樓下，於是走上嚟飲杯茶，順便贈我新書排版影印本（仲未正式出版），名為《斗數卷前卷》，好彩左丁山冇出到街啫，否則唔知點樣先至約到佢見面。佢既然自動送上門，左丁山那肯輕輕放過，立刻要佢為辦公室睇吓鼠年風水。佢係咁意贈兩句，飄然而去。公關大姐大知道斗數葉人在中環，立即急call佢寫字樓見面。點知大姐大在辦公室等到放工，還是不見斗數葉蹤影，又唔知雲遊去咗邊咯。
打開《斗數卷前卷》一睇，以為係九陰真經秘笈嚟，斗數葉原來學識淵博到極，一開始就引毛澤東之「《井贊》一九○六年秋」：「天井四四方，周圍是高牆，清清見卵石，小魚囿中央，只喝井裏水，永遠養不長。」似有深意，然後到林語堂《蘇東坡傳》自序：「我寫蘇東坡傳並沒有甚麼特別理由，只是以此為樂而已……」斗數葉寫《斗數卷前卷》，亦無特別理由，以此為樂而已，所以隨心所欲，如天馬行空，盡吐情懷，每章每節都先引用中外經典，配以名畫插圖，全書根本與一般命理書、紫微斗數書之寫作方法，有天淵之別。
咁嘅奇書，睇到左丁山頭昏眼花，究竟斗數葉想賣書，還是自娛呀？無甚藝術、電影、戲劇、哲學根底而讀《斗數卷前卷》，一定看不下去，但如果肯仔細捧讀，就會覺得斗數葉有意無意之間，批判世俗所謂「迷信的標籤」，還斗數一個正確的文化地位，從各方面探討何謂科學，何謂迷信，何謂不學無術，佢引用祁克果之言，「人要求言論自由以補回他們甚少使用的思想自由（Peopledemandfreedomofspeechasacompensationforthefreedomofthoughtwhichtheyseldomuse）。於諸今日之香港，祁克果呢句話實在大有道理！