去咗台灣觀選戰取經嘅民主黨，既觀摩大型選舉，同時又訓練黨友準時，趁今次台灣之旅同黨內兄弟玩一個小遊戲，要求行程中遲到超過五分鐘嘅兄弟，交出罰款一百蚊港幣。八方聽聞，過程中有人唔忿氣，諸如歸咎集合通知出問題、冇電梯之類，要求上訴推翻遲到指控，最終搞到要由黨內最有份量嘅資深大律師馬丁出馬，做客串判官審理有關寃假錯案。喺馬丁嘅裁決下，民主黨前日完成整個四日三夜台灣之旅所有具爭議嘅遲到案件，埋單計數，發現成班兄弟夾夾埋埋共出現十幾次遲到，收咗超過一千元罰款。據聞啲罰款會撥作黨內用途，呢次另類籌款亦提醒一班黨內兄弟準時嘅重要性。