英超球隊紐卡素上周六主場2:0贏富咸，奇雲基瑾上任64日後首次聯賽贏波，隨即升上13位遠離降班區6分咁多，降班賠率亦冷至13倍，安樂晒嘅奇雲基瑾即場表演射水慶祝一番。又係嘅，呢場維度卡入靚波，奧雲頭槌又建功，前景真係幾光明㗎！
正當奇雲基瑾同球員歡天喜地之際，老闆艾殊利就喺度唉聲嘆氣，近日不時「蟹」、「蟹」聲㖭！我求大俠多方打聽下，原來呢位開體育用品連鎖店起家、之後靠收購Slazenger等名牌子暴富嘅炒家，好似熱刺班主利維咁，做咗股市大閘蟹。
老細炒窩輪狂蝕20億
原來艾殊利學人炒窩輪，睇中英國最大樓按貸款銀行HBOS，喺8.8英鎊價位入市，股價升1便士就賺30萬鎊（約462萬港元），相反一跌亦蝕呢個數。好衰唔衰，早排美國次按信貸危機引發全球股市大跌，至上周三HBOS股價已跌近50%（3.98英鎊），蒸發近1.29億鎊（約20億港元），你話艾殊利有乜理由唔「蟹」一聲呢？
艾殊利股市損手難免影響紐卡素前景，因為之前杜拜財團提出收購利物浦時，艾殊利曾主動邀請阿拉伯佬嚟聖占士公園，話：「買唔到紅軍，買我手上嘅紐卡素都好呀！」所以，舊年5月以1.34億全面收購紐卡素嘅艾殊利，慘變股市大閘蟹之下，更加可能賣咗球會㗎！
若賣「紐」基瑾最灰
萬一紐卡素真係變天，最慘嘅就梗係1月上任嘅奇雲基瑾啦！千辛萬苦幫球會護級成功，憧憬來季可以大展拳腳之際，新老細嚟到真係唔知會發生咩事！最拍手叫好嘅肯定係要求加薪續約嘅奧雲仔，新老細斷估都唔會得罪呢位當家球星啩！