長江後浪推前浪，一代新人可唔可以換舊人，除咗要睇吓佢哋有幾本事，仲要睇佢哋後台夠唔夠厚。好似美聯（1200）主席黃建業個寶貝女黃靜怡（洋名Angela），05年前仲喺家國際會計師事務所打緊工，事隔一年左右，07年6月至08年3月已經喺美聯工商舖（8090）做執行董事，做咗都未夠一年，家陣正式加入美聯董事局做執行董事。Angela會負責「協助制訂及落實集團整體發展策略，以提升集團的效率及成效，及負責集團之企業發展及投資等工作。」
Angela同公司簽咗份三年嘅董事服務合約，每個月可以攞到六萬三人工。另外仲有酌情花紅同年終溢利攤分，而佢手上就揸住730.9萬股美聯嘅購股權，行使價係7.858蚊，但美聯上個禮拜收報6.94蚊，太子女睇怕要努力工作，為美聯創造佳績，刺激吓啲股價先有機會行使囉。
Angela芳齡只得27歲，係香港大學嘅會計及財務學士，屈指一算，佢同前香港游泳代表方力申應該係同屆㗎喎！年紀輕輕就做董事，人工仲咁高㖭，真係恨死隔籬！