台灣大選結束，換咗小馬哥上台，好多香港人都與有榮焉，一來小馬哥係「香港人」，二來香港仲有唔少中華民國「遺民」，八年前見到民進黨上台真係心傷透，苦等多年，民進黨終於落台，大家興奮莫名，瘋狂揮舞青天白日滿地紅旗，慶祝國民黨重新執政。
香港已停產兼冇存貨
青天白日滿地紅中華民國旗近年喺香港罕見公開飄揚，事實上泛藍支持者喺香港一旗難求。香港阿九後援會負責人蘇建名同八方講，佢哋佈置慶祝會場地，要張羅幾百面青天白日滿地紅旗做裝飾，又要派畀支持者揮動搞氣氛，問過香港造旗廠商，點知全部都話冇貨，因為近年冇乜人買青天白日滿地紅旗，停產多時，霎時要造都幾棘手。廠家開價10蚊一面布旗，又稱冇熟手工人，唔保證完全符合規格。
蘇建名話唔估計係咪因為政治因素令廠商唔做生意，雖然香港冇得賣中華民國旗，不過台灣大把，佢哋向台灣訂購，連空運郵費每面平均只係5蚊，直情平靚正。除咗阿九後援會，噚日仲有兩個支持藍營組織搞祝捷活動，好多人都拎住支青天白日滿地紅旗嗌「凍蒜」（當選），中山學會負責人羅照輝話，佢哋啲中華民國旗都係由台灣運嚟香港，「香港應該冇地方賣呢支旗好耐嘞。」
神州青年服務社噚日喺旺角行人專區直播台灣點票情況，旺角街頭出現多面青天白日滿地紅旗飄揚，負責人林偉棠話大部份旗都係託朋友喺台灣帶返嚟香港，亦有啲係私人珍藏，「有啲朋友收埋咗好多年，終於可以拎番出嚟！」林偉棠話有警員勸喻佢哋唔好咁揚，高調喺街頭揮舞中華民國旗「唔係幾方便」，不過林偉棠話市民自發舉旗，佢都冇符。
回歸後曾有警察拆旗
回歸後政治氣候唔同晒，掛五星紅旗理所當然，掛青天白日滿地紅旗有壓力。資深大律師兼立法會議員余若薇指，𠵱家法例冇明文禁止掛中華民國旗，市民掛旗、舞旗都唔犯法，警方冇權干預。雖然市民有掛旗自由，實際上港府卻容不下中華民國旗，幾年前雙十節銅鑼灣街頭有人掛出幾面青天白日滿地紅旗，冇耐就有警察清場。十幾廿年前調景嶺、石硤尾、荃灣一片青天白日滿地紅旗海盛況，已成絕唱。
mailto:[email protected]