波浪分析專家請食午飯，當然係去佢嘅飯堂「賀菊」，佢係「賀菊」Kiku常客，人人訂唔到位之時，佢都有辦法訂到一間房，想話食靚刺身/壽司，跟住老許到「賀菊」就有保證。
波浪許呢日請埋佢大佬P許，經紀K與口口聲話今年年尾退休嘅老曹。老曹舊著《論勢》，成為○七年暢銷書，新近花咗幾個晚上寫出一本新著《論戰》，一推出市場，立即熱賣，唔到你唔服。左丁山問老曹：「你唔好成日話退休至得㗎，冇咗『投資者日記』，讀者點有心機食早餐呀？」老曹話：「服務合約係咁寫明㗎，我尊重合約啫。」合約可以改嘅啫，搵老曹寫稿，使乜有合約呀。
波浪許又出版一本新書，名為《泡沫爆破了怎麼辦》？請食飯之日，上午恒指跌咗近九百點，食完飯再跌，全日下跌一千一百五十二點，收報21,084.6點，比去年高峯期已經冇咗三成半，如果喺二萬七千點時聽股神講入市，都輸得幾入肉吓。波浪許本書早啲出版，豈非功德無量？老曹專開玩笑：「老許時時睇中，但係時時睇快三個月，你哋聽佢講完，記得三個月後至講，股民會當你係神仙！」記得二○○七年九月，波浪許就出版《面壁集：美股難逃暴跌命運》，叫股民不可忽視之。乜嘢叫做暴跌？如貝爾斯登在三月十三日值六十美元，三月十四日值三十美元，三月十七日以二美元代價，俾JP摩根大通收購。由六十美元至二美元，中間只係過咗幾十小時，呢啲就叫做暴跌嘞。
美股整體不致於如此暴跌，但跌勢已成，聯儲局出盡九牛二虎之力，都難以挽回。影響之下，香港股市因為流動性充足，就成為英美基金削肉救亡最大救星，於是拋售港股、港企套現、班師勤王，於是洗倉去也，後市仲有得跌，目前情況非減息可以解決，而係信心問題，信貸市場如斯緊張，銀行死攬住啲頭寸，情願水浸都唔願放出去，唔通聯儲局夠膽逼銀行放數乎？波浪許請股民千祈小心，勿中減息陷阱，聽唔聽由得你。