與球星古列治（RuudGullit）傳出緋聞的李珊珊，昨日以一身粉紅低V連身短裙，出席「高達博覽──三國篇」展覽活動，這位新鮮出爐的球星緋聞女友，活動上全程表現風騷，對於被稱為「球星女友」，珊珊報以甜到漏的笑容，坦言和古列治認識是緣份的天空，是好幸運的一件事。
李珊珊昨日所穿的低V裙，完全凸顯其豐滿的上圍，甫出場便惹不少「龍友」拍照，珊珊說：「我向來都好穩陣，一早打好晒底，𠵱家又係春天同復活節嘛，最緊要係大家開心，如果到夏天會仲多啲嘢睇㖭！」據講今次珊珊出席活動的酬勞好好，差不多六位的數字，被問到是否因為貴為「球星女友」，所以身價特別高？珊珊說：「吓！係咩？我諗唔係，冇呢啲咁嘅事，咁我本身都有自己嘅身價，人哋覺得我值就搵我。」
「認識係緣份」
珊珊早前和古列治傳緋聞，對於被指是球星女友，珊珊續說：「我哋認識係講緣份，身邊好多朋友都戥我開心，總之我一向交朋結友都係要啱傾，唔理佢係乜嘢人，不過我覺得自己都好易同人傾得埋，我仲覺得我近排桃花好旺，身邊多咗好多唔同國籍嘅朋友，就算拍拖都係要由朋友做起，啱傾就繼續做朋友，之後先至慢慢發展，唔啱傾就算。」
記者問珊珊近來有否與古列治聯絡？她說：「唔答！」問她是否比以前開心，她說：「係呀！你哋話我升咗grade嘛！」有否學定荷蘭文與古列治溝通？她說：「我試過聽佢講過幾句，不過我一啲都聽唔明，我諗呢啲係我能力以外嘅嘢，所以我唔會學，人哋會就我！」
「買樓睇定先」
另外，楊秀惠亦有同場出席活動，對於有報道指她買樓一事，秀惠說：「我最近的確有呢個打算，我希望喺香港買樓同爸爸媽媽住，但係有朋友話呢排樓價好貴，所以要睇定先再決定。」
採訪：何慧斯 攝影：仇志德